Tura, May 5,2025: Pakistan aro Bangladesh a·songni manderang Meghalaya a·dokona, mongsongbate Garo Hills-ona niam gri napsrukbae songdongenggipa manderangko, a·songtang Pakistan aro Bagladesh-ona watpilatna man·na gita bilakbate sandirokaniko dakchina Tura-ni MDC aro Bharatiya Janata Party (BJP)-ni State Vice President Bernard Rimpu N Marak, a·dok sorkariko aro Garo Hills Autonomous District Council (GHADC)-ko didiataha.

Ru·uta bilsirangonin gipin a·songni manderang Salgro Salaram jolrango, mongsongbate Garo Hills-o songdong a·chae jelbra jelsuaniko nikna man·aha. Ua manderangan East Pakistan ba Bangladesh a·songoni niam gri napsrukbagiparang ong·a. Ua manderang bang·batan Garo Hills-ni a·kawe jolrango aro a·bri jolrangoba songdong a·chatokenga aro uni a·selsa Garo Hills-o inditan manderang jelbra jelsuna a·bachengbaaha, ine Marak parakataha.

Batanggipa Congress sorkarini somoirango, indake niam gri napsrukgiparangko champengna aro am·sandina gita maming ja·ku de·anirang dongjahani a·sel Garo Hills-o hajalni hajal gipin a·songni manderang niam gri songdong a·chatokenga. Uni a·sel da·o Garo Hills-o Tribalrang, an·tangtangni a·arang, bagan barirangko gimaatna nangengaha aro gipin jatrangko jikse ra·anirang ong·aha aro jatni on·gimin bilo pangchake, an·tangtangni man·gnirangko gimaatna nangaha ineba Tura-ni MDC parakataha.

Garo Hills-o Electoral Roll aro Land Record-rangko name rakkianichi jolni Tribal jatrangko chel·chakna nangenga. Garo Hills-o, mongsongbate sima jolrango donggipa biaprango, niam gri biming segataniko rim·na man·na gita Aadhar Card-ko Election Photo Identity Card (EPIC) baksa link ka·china Marak didiataha.

Indake, niam gri napsrukanirangko champengna gita a·song damgnini sima arirango manderangni re·ruraanirangko nambate nirokchina gitaba Marak, a·dok aro ma·mong sorkarirangko didiataha.

Sorkarini kamrangko on·anio aro a·ani nokgipa ong·aniko Tribal-rangna on·gimin bilo pangchake chel·chakchina didiatenba, Garo Hills-o songdongenggipa Tribal aro Tribal ong·gijagipa manderangko, indake gipin biaprangoni napsrukbaaniko champengna ku·cholsan ong·e bakrimchina gitaba Marak didiataha.

Iako janapatengon, torom ba jatni gimin ong·ja, indiba niam gri gipin a·songrangoni napsruke songdonganiko champengsoani ong·enga. Gipin a·songrangoni niam gri napsrukbae songdonganiara jolni manderangna kenchakanisan ong·aigija pilakni gitan gimaaniba ong·enga, ine Tura-ni MDC parakataha.

Pakistan-ni manderangde an·tangtangko maming saloba Pakistan-ni mande ine aganjawa, an·chingsa uamangko am·sandie, a·songtangona watpilatna nanggen, ineba Marak parakataha.