Baghmara, Aug 23,2024: Nokrek Area Development Committee (NADC), Bristibar salo South Garo Hills a·jani Durama Wagegitok RMSA Secondary Skul nokko rika matchotgija galchipe donenganj gimin contractor-ni kosako Skul Education-ni Director aro SENAM-SSA-ni Literacy State Project Director-na sedoataha.

NADC-ni RTI ka·anio ma·siani gitade, Durama Wagegitok RMSA Secondary Skul nokko rikna Tura RC Road-ni Sengrak D.Sangma-na re·anggipa 2021 bilsini December 13 tariko work order-ko on·aha aro ua Skul nokko rikna chu·gimik gong kror 1 lak 11 hajal 17 tangkarangko work order on·aha.

Work order-o janapani gitade, Durama Wagegitok RMSA Secondary Skul nokko ja 12-ni gisepon matchote rikani ong·achim. Indiba Durama Wagegitok RMSA Secondary Skul nokko rika da·onaba matchotkuja.

Ua Skul nokko re·anggipa 2022 bilsio rikna a·bachengaha aro 2023 bilsini November jaon rikgija dontongaha. Indake Durama Wagegitok RMSA Secondary Skul nokko rikgija galchipa ja 10 gapaha.

RTI ka·anio ma·siani gitade, ua Skul nokko gadang 2, dake ground aro 1st floor-o room ge 13-ko rikna estimate tariaha. Indiba ground floor mangmangkosan slap dalaie donaiaha.

RTI-na aganchakani gitade, contractor, gong lak 34, hajal 28 tangkarangko okaha. Indake ua Skul nokko rika matchotjani a·sel, skigiparang aro chatro chatrirang neng·nikaniko man·enga, maina class room-rang dongja aro skigiparangna dingtang room-rangba dongja. Apsandaken skigiparang aro chatro chatrirangna paikanarang dongja.

Uni gimin ua skul nokni bidingo ta·rake nirok sandianiko dakenba, niam gita ta·rake ja·kurangko de·e, raka sastiko on·china NADC-ni President Semonsing A.Sangma, Skul Education-ni Director-ko didiataha.