Shillong, April 28: Shillong North Eastern Hill University (NEHU)-ni Hindi Department-o skigipa Assistant Professor-ko dokanio jak dongani gimin Sombar salo, NEHU Students Union (NEHUSU)-ni President Sandy Sohtun-ko pulisrang rim·aha.

East Khasi Hills a·jani Superintendent of Police (SP) Vivek Syiem-ni parakatani gitade, ua a·selni bidingo NEHU-ni skigipa badi (FIR) ka·ani ja·mano, NEHUSU-ni President-ko rim·aha.

Shillong NEHU Campus-ni Assistant Professor-ko dokani bidingo pulisrang sing·sandienba, ua a·sel ong·anio jak donggipa gimikkon pulisrang rim•gen ine SP parakataha.

Shillong NEHU Campus-o donggipa Hindi Department-ni Assistant Professor Dr Alok Singh-ko re·anggipa April 24 tariko, NEHUSU-ni President aro adita sak manderang, uni office chamber-o kragija dake dokani bidingo Dr Singh, April 25 tariko, Mawkynroh Outpost-ni Officer-In-Charge-na FIR ka·doangaha.

Dr Alok FIR-o NEHUSU-ni President Sandy Sohtun baksa gipin sakbonga manderangko biming mingaha aro ua manderang, uko kesichi so·otna jotton ka·aha ineba janapaha. Uamangni indake kragija dakaniara mikkangchina kenani ong·enga ineba Dr Alok janapataha.