Tura, July 4,2025: West Garo Hills-ni ge 20 sorkari LP skulrangko chalaina Mothers Union-ni Education Department baksa June 19 tariko soi ka·grikgipa Memorandum of Understanding (MoU)-o bang·a niamrangan skigiparangna aro skulko nirokenggipa Managing Committee-rangna on·gimin bilrangko rea·sekdraani ong·enga ine A·chik Youth Welfare Organisation (AYWO), Central Governing Body (CGB) parakatenba, July 3 tariko West Garo Hills a·jani DC-ni jak gita a·dokni Education Minister Rakkam A.Sangma-na sedoatenba, ua MoU-ko ta·rake den·galpilchina dabiangaha.

West Garo Hills-ni sorkari LP skulrangko nambate chalaina aro nirok simsakna gita re·anggipa June 19 tariko a·dokni Education Department baksa Tura-ni Mothers Union MoU-o soi ka·grikaniara, skigiparangni aro Skulko nirokenggipa Managing Committee-ni kosako ja·ku de·ani ong·enga ine AYWO suk ong·gijaniko parakataha.

Indake ong·engon, sorkari LP skulrangko chalaina soi ka·grikgipa MoU-o on·gimin niamrang lekka porani kamrango skigiparangna aro Managing Committee-rangna on·gimin bilrangko bon·atani ba ra·sekani ong·enga ine AYWO parakatenba, ia niamrangko nipiltaichina Education Minister-ko didiataha.

“Uni gimin ia MoU-ko jasani gisepon den·galpilchina, All Meghalaya Primary Skul Teachers” Association (AMPSTA)-ni dabianio chakpaaniko on·enga aro Garo Hills-o lekka poranirangko nosto ka·na man·jana gita ta·raken skigiparangni neng·nikaniko namatchina chinga dabienga” ine AYWO, CGB-ni General Secretary Changkey Marak parakataha.

Iani bidingo adita salrangna skangan AMPSTS soi ka·grikgimin MoU-ko ta·raken den·galpilchina dabie a·dokni Skotong Minister aro Education Minister-na sedoataha. Indake skigiparangni kosako neng·nikaniko ra·bana ja·ku de·aniko jegalatenba, skigiparangni dabianio chakpaaniko on·angkugen, ineba AYWO parakataha.