Williamnagar, Nov 20, 2024: Garo Students’ Union (GSU) Mangsang Unit, Mangsang jolo dingtang dingtang development-rangko nikna man·jaengani gimin, jolna namroro silroroani bak rengsirangko tikatpachina, dabie segimin chittiko Monggolbar salo a·dokni Skotong Minister-na on·angaha.

GSU dilgiparangni parakatani gitade, bang·a political dilgiparangan, election-ni somoiosan development-ko ku·rachaka dakenba, nangchongmotgipa dabianirangko chu·sokatrongja.

Mangsang jolrangko namroro silroroatna ru·utbea salrangonin dingtang dingtang NGO-rang dabiengachim, indiba da·alona kingkingba maming namdapani kamrangko Mangsang jolo nikna man·kuja, ine GSU Mangsang Unit parakataha.

Garo Hills aro West Khasi Hills sima jolrango a·ana kajia ong·anirangko da·onaba namatna man·chipgija dongengon, Garo Hills-ni Mogru, Rengka aro Nongkingkil Mangsang songrangko West Khasi Hills, ra·sekangaha ineba janapataha.

Una agreba, mongsonggipa Rongjeng aro Mangsang gita A·dokgre-ona dakanggipa ramako da·onaba taria matchotkujani gimin, NGO-rang changni chang ia ramako motchote tarichina gisik ra·atpiltaiani chittirangko seataha. Indiba a·dok sorkari knachakjani gimin, ia ramako ta·rake matchotatchina, GSU Mangsang Unit, changsatai Skotong Minister-ko didiangaha.

Mangsang-o gital Community and Rural Development (C&RD) Block office-ko songe on·china gita, GSU-ni mingsa mongsonggipa dabiani ong·a aro ru·utbea salrangonin dabibaenga. Uni gisepon maibakai Rongjeng Civil Sub Division-ko upgrade ka·na man·ode, Mangsang-o Block Office-ko songgen, ine political dilgiparang ku·rachakachim, uni gimin, Mangsang jolo songdongenggipa manderangni namgnina ku·rachakgiminko ta·rake chu·sokatna GSU Mangsang Unit, Skotong Minister-na seatgipa chittio dabiangaha.

Minggipin dabianiara, Mangsang-o Fire Service Station-ko donchina ru·uta salrangonin dabiengachim, maina Mangsang jolo 60 ba 70 songrangko man·gope mande jelanirang bilsina bilai batroroenga. Uni gimin, rang·gitik a·sel ong·ani somoirango manderangko dakchakna man·na gita Fire Station-ko nangchongmotenga ineba GSU dabiangaha.

“Mangsang jolo songdongenggipa manderangni palo, chinga ia dabianirangko dakan baksa mikkangchiba dontonggija dabiani chittirangko on·angkugen, uni gimin chingni ia dabianirangko ta·rake chu·sokatpachina”, GSU Mangsang Unit, Skotong Minister-ko didiangaha.