Tura, April 28,2025: April 28 tarik pringo miikka balwa ta·rakanichi Tura Upper Babupara-o bol pangsa pangpike gari bolgniko nosto ong·ataha. Sombar pring 1 bajimangoni 6 bajimangona Tura aro uni wilwilao mikka balwa bilonge rakaha aro badiaba jolrango gari re·na man·na man·gija bolrang aorokrango be·dapaha.

Indake, mikka balwa rakgniko Indian Meteorological Department (IMD)
Meghalaya-oni u·iatani gitade, Meghalaya-ni gimik a·jarangon mikka kimpretanirang aro balwa rakanirang sal 4 joljol ong·angkugen ineba mikkrakataniko on·araha.

Rura-osan ong·aigija Garo Hills-ni dingtang dingtang biaprangon, mikka kimpretani aro balwa rakanichi adita neng·nikanirangko ong·naba gnang. Uni gimin manderang an·tangtangna simsake dongtokchina, IMD Meghalaya-oni mikrakataniko u·iatsamsoaha.