Shillong, May 22,2025: Ma·mong sorkarini ra·gatgipa Jal Jeevan Mission (JJM)-ni kamrang Meghalaya a·doko baditana kingking matchotaha ba matchotkuja, Central-ni Team-rang, ground inspect ka·na gita Meghalaya-ona re·bagen ine koborko man·soaha.
Kobor man·soani gitade, Central-ni Team-rang, Meghalaya a·dokosan ong·aigija, dingtang dingtang a·dokrang jekai Madhya Pradesh, Rajasthan, Karnataka, Uttar Pradesh, Odisha, Gujarat, Tamil Nadu, West Bengal, Andhra Pradesh, Jharkhand, Punjab, Sikkim, Chhattisgarh aro Goa a·dokrangonaba JJM-ni bidingo inspect ka·na re·anggen.
Meghalaya a·doko JJM-ko ra·gatani bidingo, mongsongbate Garo Hills-o bang·a complaint-rang ma·mongona sokangahani gimin, baditana kingking kakket ong·a, uko sandina gita Central-ni Team-rang a·dokona re·baenga.
Ma·mong sorkarini ra·gatgipa JJM scheme-ni kamrang Meghalaya a·doko chu·sokaha ine a·dok sorkarini tol·e, ong·gija report-rangko ma·mong sorkarina on·atahani gimin, Meghalaya BJP batanggipa adita jarangna skang CBI-chi sandianiko dakchina dabiaha. Maina JJM scheme-ara mandeni janggina nanggipa aro gamchatgipa scheme ong·ani gimin maimancha ong·enga sandianiko dakna Central Team-rang a·dokona re·baenga ine kobor man·aha.
