Shillong, Dec 5,2024: Congress doloni ong·katanggipa Trinamool Congress (TMC)-ni dilgiparang, Congress dolona re·bapiltaina miksongenga ine jangbingbangengon, TMC-ni State President Charles Pyngrope, 2028 bilsini Assembly election-na skang Congress dolo nappiltainaba donga aro ua re·bapilahaode, a·dokni gitcham Skotong Minister aro TMC-ni dilgipa Dr. Mukul Sangma-ba Congress dolona re·bapilgnok ine Meghalaya Pradesh Congress Committee (MPCC)-ni President Vincent H Pala parakataha.

“Ua re·bapilgenchimode, anga uko rimchaksoenga indiba da·o dipet anti-defection law dongani gimin ua re·bapilna man·kujaenga. Anga ka·donga ua 2028 bilsio Congress dolona re·bapilgen. Charles (Pyngrope) Congress dolona re·bapilahaode Dr. Mukul Sangma-ba re·bapilaignok” ine Pala aganaha.

Ua sakgni dilgiparang, a·dokni Congress dol baksa agangrikanirang dongama ine sing·anina aganchakengon, “Anga Charles Pyngrope-kode ripengska ong·e grongronga, indiba Dr. Mukul-kosa gronggija ru·utengaha” ine Pala aganchakaha.

Congress dolona re·bapilna miksongenga ine jangbingbanganiko TMC-ni State President Charles Pyngrope-de raken jegalatskaaha aro Congress dolo nappilna maming chanchianirang dongkuja ine talatskaaha.

Adita salrangna skang TMC Nongthymmai block-ni sak 1300 member-rang, Congress dolo napangani ja·man, TMC-ni State President Charles Pyngrope-ba Congress-o nappiltainaba donga ine bang·a manderangan chanchichipanirang ong·katokenga.

“Uamang angko wate re·angahaoba anga uamangko champengna bil dongja” ine Pyngrope parakatskaha.

Congress-o nappiltaina MPCC-ni President Vincent Pala-ni ong·kataniko sengengama ine sing·anina aganchakaniko on·angengon, ua an·tangde jemingba kam ka·rimna kusi ong·aia, indiba da·o dipet darangba uko gipin political dolo napchina didia dongkuja aro ua an·tangba gipin party-rango napna chanchia dongkuja ine TMC State President parakataha.

Indake ong·engon, MPCC-ni President Vincent Pala, 2028 bilsionan a·doko Congress party-ko dilangnikkuna nangnikenga ine parakatskaaha.