Tura, Nov 9, 2024: West Garo Hills a·jani Jengjal Baljek Airport-o ong·atenggipa
Me·gong Festival-ko dongimin niamrang gita ong·atjaengani gimin Jengjal jolni dingtang dingtang NGO-rang jekai GSU, AAYF, FKJGP, ADE aro GSMC jegalataha.

Ia bilsioba Me·gong Festival-ko re·baenggipa November 29 aro 30 tarikrango apsan Jengjal Airport-on ong·atna manchisoaha aro ia chango Me·gong Festival-ona a·gilsak gimiko mingsinggipa Rock Band ‘Europe’-ko rimbana tik ka·manaha.

Me·gong Festival-na dongimin niamrang aro miksonganirang dongachim, indiba dongimin niamrangko Organiser-rang, ja·rikjaenga ine NGO-rang matnangataha.

NGO-rangni parakatani gitade, jatni daka rikanirangko tange rakkina, jatni man·rikanirangko ra·doana, Garo Hills-o Tourism aro Economy-ko tang·doatna, jatni doka dam·ani, chrokani aro uandake joltangni manderangna namgniko on·na gitasa miksonge, Me·gong Festival-ko ong·atengachim, indiba batanggipa bilsigittamna, Me·gong Festival-ko organize ka·giparang, Festival-ni niam aro miksonganirangko 20 percent-ba ja·rikja. Uni a·sel joltangni manderangna maming man·dapani dongja, indin gong krorni kror tangkarangko koros ka·enga ine NGO-rang parakataha.

Indake, joltangni manderangna maming namgniko on·jaengani gimin, Me·gong Festival-o joltangni manderangko bak ra·na on·jaengani gimin, ia bilsio NGO-rangni dabianirangko chu·sokatjaode, Me·gong Festival-ko Baljek Airport-o ong·atna man·jawa, ine NGO-rang parakataha.

Me·gong Festival-ko ong·atanio, garirangko maming neng·nikani gri watna gita traffic-ko tarisochina, jolni manderang garirangko donchakani biapko tarichina, Festival-ko ong·atna skang organiser-rang baksa jolni manderang tom·e, nanga ja·kurangko de·china, Airport-ni ning·o dokkan dakgipa joltangni manderangko dam komie ra·china, joltangni manderangko Volunteer rakkichina, Nokmarang aro dingtang dingtang dolrangna aro jolni Committee-rangna dingtang parking-ko donchina NGO-rang, District Administration-ko didiataha.

Me·gong Festival-o git ring·gipa aro dokgipa dam·gipa dolrangko seokanio, gipin a·songrangoni re·baenggipa dolrang baksana Garo Hills-ni mingsinggipa Lucas Marak, Riprap, Rough Road, Sunday Star, Ke Ke, Rester Brown aro uandakgipa joltangni manderangna cholko on·china gitaba NGO-rang dabiangaha.