@ghdnewd.in@

Tura, Jan 15, 2026: GSU South Western Zone, (South)-ni gitcham President, Salman D. Sangma, re·baenggipa GHADC election-o 12-Nogorpara elakkaoni susana gita, January 15 tarik Bristibar salo Trinamool Congress (TMC) Party ticket-na dorgastoko on·eaha.

“Anga an·tangko areani manderangna aro jatna a·songna kakketo kamko ka·na gita gisik ka·tong gimikchi on·kange re·baenga. Uni gimin pilak angni ka·sara Nogorpara aro Salmanpara jolni manderangko apsan ku·monge kamko ka·na mol·molatpaenga. Hai an·ching binekgimin District Council-ko rikpilataina aro ku·cholsan silataina kamko ka·na” ine Salman Sangma ku·monganiko on·ataha.

GHADC-ko 1952 bilsini April 14 tarikon a·bachengataha aro da·o bilsi 73 mang gapengjok. Uni gimin, District Council da·ode, namen bilakgipa ge·sa, Institute ba A·chik jatni niam-retiko chimonge donram biap ong·nasa nangjokchim. Indiba da·alo batesa bilgribeaha. A·chik jatni Identity-ko name ripingna aro bil gnange sason-ni bidingo rakkina gita nangenga. A·chik jatni mingsa nangchongmotgipa aro nisengsoe dongenggipa, Garo Customary Law (GCL) mangmangkon da·onaba bimang ong·atkuja. Miggipinara Separate Electoral Roll (SER)-kobs da·onan a·bachengatkuja. Da·onaba skangni MLA aro MP election-o jakkalgipa Electoral Roll-kosa, GHADC election-oba jakkalenga, ine Salman Sangma parakataha.

Unbaksana Development-ni Scheme-rangko nirok sandina gita, Public Accounts Committee (PAC)-koba Council-o songna nangchongmotenga ineba ua aganaha.

GHADC-o da·onana, Service Rules aro Financial Rules-ko tarikuja, ukoba tarina nanggen, da·o Green Book-o donggipa Rules-rangko name che·em, che·em nipiltaie, Amend ka·na gita nangenga. Plain Belt-ba A·kawe jolrango Non Tribal-rang, Sixth Schedule-ni niamko pe·e skatang songdong a·chaaniko nambate aro rakbate sandina gitaba nangenga. Skangode, rorirang A·kawe jolo bang·kujachim, indiba ia chasongo Assam aro Bangladesh-ni rorirang niamgri napsrukbae songdong a·chatokengjok, iarangko, darangba am·sandie watatpila dongkuja. Uni gimin, iarangkoba nirok sandina nangenga, ineba Sangma aganaha.

GHADC-ni jurisdiction ba map-wa·rengni gita chu·gimik, 3152 Square Miles donga. Uanoni 2971 Square Miles-de Hill area ong·a aro mitamde, plain area ong·achim, indiba Inter State Boundary, Assam aro Meghalaya jean GHADC-ni jurisdiction-o ga·akachim, mitam a·arangkode Assam-chi napatengjok. Uni gimin Inter State Boundary-koba name dake Demarcate ka·na nangpilgenok, ineba ua janapangaha.

District Council-ko mikkangchi tangbange rakkina gita, “Angaba saksa A·chik ong·pae, an·tangko on·kange, Nogorpara GDC elakkao MDC-na susapaenga aro Nokgipani ka·saachi chepana man·ode, a·songna jatna an·tangni changa sapani kri aro u·i-ma·sianiko jakkale, kamko ka·gen. Uni gimin hai, an·ching ku·mongna, hai ja·ku de·na, “Hohoesa Pakchara, Su·songesa Wegara”, A·chik A·song tangbangchina ine Salman D. Sangma party ticketna dorgasto galani ja·man, kobor ra·timgiparangna aganaha.