Tura, Dec 14, 2024: Garoland State Movement Committee ( GSMC)-ni dilgiparang A·chik A·songni nanganirangna, New Delhi songjinmaona re·ange India a·songni dingtang dingtang dilgiparangko grongeaha.

GSMC, CEC HQ, Tura-ni Acting Chairman Te Balkarin Ch.Marak baksa General Secretary Tony Tojrang B. Marak, Assistant Environment Secretary Silbirth A. Sangma, South West Garo Hills-ni Co-Chairman Trellingbirth Ch. Sangma, Banang R. Marak, Jaswell Marak, Jenol A. Sangma December 12 tariko Delhi songjinmaona re·ange, Airport Authority of India (AAI)-na aro dingtang dingtang Ministry of Home Affairs aro India-ni President-ko gronge, Garo Hills-o galchipe donenggipa Baljek Airport-ko taripiltaichina mol·mole segipa Memorandum-ko on·eaha.

“Chingni am·sandie nikani gitade, Baljek Airport-o sak 20 gadona man·gipa seat-rangko nikaha aro batanggipa 2008 bilsio India-ni President Pratima Devi Singh Patel oprake on·aha. Una agreba Ministry of Home-ni Scheme-rangko Baljek Airport-na chamgiparang donga, uaranga UDAN, RCS scheme-rang donga.Unbaksana bang·a tangka paisarangko Baljek Airport-na chamanirangko nikaha” ine Balkarin Marak parakataha.

Indake ong·engon, mande ra·ako man·na kragipa Meghalaya a·dokni Skotong Minister Conrad K.Sangma-ni re·gipa June 4 tariko seataniko nikna man·aha. Uni seatgipara Baljek Airport-ko dal·batatna ba extension ka·china, Airport Authority of India-na chitti seataha.

“Apsan somaio chinga 2-Tura-ni MP Saleng A. Sangma-ko uni dongchakenggipa nok New Delhi-o gronge chittiko on·aha. Unon Saleng Sangma-ba A·chik a·songni namgnina, Baljek Airport-ko taripiltaichina aro Tura NEHU Campus-o chu·gimik subject-rangko ra·gate on·china, pangkamgipa Vice Chancellor-ko Tura NEHU Campus-o songe on·china didiangan baksa ku·rang on·na aro raken kamrangko ka·angna ku·rachakataha” ine GSMC-ni Acting Chairman parakataha.

Baljek Airport-ko oprake ba nokdonggae on·aoni bilsi 16 ong·piloba, a·dok sorkari galchipe donenga aro ong·gija nanggija dakbewalrangko ong·atenganiara, Baljek Airport-ni mingnamaniko ba gunko gimaataona sokatenga. Gipin biaprangchi songre songgabatna nangengon, a·dok gipinchisa re·angna nangenga.

Uni gimin A·chik a·songni manderang gipin biaprangchi songrena namnikgiparang bang·en donga. Uamang chotchanggija a·songtango songreenga, una agreba, gipin biaprangchi jekai Europe, USA, Asia a·songrangona songregiparang bang·en gnang, uni gimin ta·raken Garo Hills-ni Baljek Airport-ko taripiltaichina, a·dok sorkariko aro Civil Aviation Ministry, Government of India-ko GSMC-ni dilgiparang gronge mol·molangaha.