Baghmara, Sept 10,2024: South Garo Hills a·jani Chokpot Civil Sub-Division-ni ning·o donggipa Chokpot-oni Kakiza, Kakiza-oni Asakgre-ona re·gipa ramarang namsrangjani gimin jolni manderang bang∙a neng·nikarangko man·enga ine parakatenba, sorkariko niroke kam ka·atpachina, Garoland State Movement Committee (GSMC), Chokpot Regional Unit-ni President Lusai Ch Marak mol·molataha.

Chokpot jolo songdongenggipa manderang ru·uta bilsirangonin rama namjani a·sel re·a doanirango namen neng·nikanirangko chagrongna mangengoba, ramarangko namdapatna jotton ka·gipa darangba dongja, Chokpot jolko galchipmanchaenga ine GSMC Chokpot Regional Unit-ni President parakataha.

Lusai Marak-ni parakatani gitade, South Garo Hills-o gitchambatgipa aro galchipako man·gipa, Chokpot jolni ramarangan ong·a. Ia rama mamjani a·sel manderangna kenchakani ong·enga, maina Chokpot jolni ramarang nosto ong·ani a·sel, ja·achi re·na, gari salna rama a·klokrara dake, a·dubekrara dakani gimin, salanti re·ruraanio namen neng∙nikaniko man∙enga. Ia obostarang mongsongbate wachini somoio neng·nikanirangko man·enga.
Indake rama namjani a·sel sagipa manderangko hospital-rangchi ra·angna, mongsongbate oko donggipa me·chikrangko gipin biapchi ta∙rake re·angna man·jae basakobade ramaon janggi gimaaona sokenga ineba parakataha.

Rama jal∙lang mangmangsan ong·aigija, network-rangko tik ong·e watjani a·selba, Chokpot jolni manderang bang∙a neng·nikanirangko chagrongenga. Uni gimin ia kamrangko ta∙rake nirokatpachina, GSMC Chokpot Regional Unit, a∙dok sorkariko didiataha.

Unbaksana Kakkija, Asakgre aro Budugre songni manderang rama jal∙langrangko namdapatchina, PWD (Roads)-ni Minister Prestone Tynsong-na chitti sedoatenba, Chokpot jolo bang·a mingsing mingamgipa nina nitobegipa biaprang donggenchimoba, rama jal∙lang namjani a∙selaan a∙dokna aro jolo songdongenggipa manderangna bang∙a gimaaniko ra∙baenga. Jolo tourism-ko tang∙doatna, rama jal∙langan mongsongbatgipa ong∙a. Uni gimin mikkangchi baikamgipa ramarangko tarie on∙pachina a·dokni Skotong Minister-ko mol∙molataha