Tura, April 1, 2026: Tura Rongkhon-o donggipa Jaynie Ningring N.Sangma-ni segipa Kenedy R. Marak, Monggolbar salo, Social Activist ine an·tangko a·kanggipa, Greneth M. Sangma-ni kosako Tura Pulis Station-o counter FIR-ko ka·doangskaha.

Greneth M.Sangma re·anggipa, March 24 tariko Jaynie Ningring N.Sangma-ni kosako matnange, FIR ka·ahachim. Ua “Angni jikgipako duk on·na, namgija bimingko man·atna aro chingni nokdangna gisiko dukko on·na miksongani ong·a.
Angni jikgipani kosako matnanganiara maming pangchakani gri, tol·esa manderangni mikkango namgija bimingko man·atna miksongani ong·a. Greneth Sangma, angni jikgipani kosako tol·e matnangenna, kakket ong·gijagipa obostarangko uni kosako galaha, aro maming ainni gita kema watna man·gijagipa ba aino pangchakani grigipa obostarangko una ra·baaha” ine Jaynie Sangma-ni segipa matnangatskaha.

Ia FIR-ko on·aniara ainko namgijana jakkalani ong·a, jeon kakket bicharko sandiana bate, angni jikgipako kenatna miksongani ong·a.

Iandakgipa kamrangara mandeni cholon-bewalko nosto ka·ani ong·a. Ua pangnan songsalna kam ka·anio maming aino pangchakani gri namgijako daknasa jotton ka·enga, ine Greneth Sangma-ko Marak matnangataha.

Ua manderangna kenchakgnigipa obostarangko janapate, jatni gisepo meligrike donganiko nosto ka·na, “Angni jikgipako tol·e matnangenba, angni nokdangni manderangni janggina kenchakaniko ra·baenga” ineba Marak parakataha.

Greneth M. Sangma, social media-o ong·gija dake, “Angni jikgipako, “Jaynie Chowdhury” ine biming minge, A·chik jatni ma·chongko chonnike, matrilineal society-ni niamko pe·e, uko kal·stale uni bimingko dingtangatna jotton ka·aha. Unbaksana chingni nokdangni kamrangkoba, chonnike, uko “gipinni segipako ra·sekgipa” ine tol·e Social media-o gipataha. Chinga jik-se tom·tome aro nangrime janggi tangenga” ine Kenedy Marak talataha.

Marak-ni parakatani gitade, Greneth M. Sangma RTI ka·ani aro FIR-ni copy-rangko social media-rango gipataha. Jean IT Act, 2000-ni niamko pe·ani ong·a aro maming pangchakani gri document-rangko gipataha. Una agreba, uni FIR-o, ua “Angni jikgipani ma·a paani bimungko “siaha” ine seaha. Indiba da·odipet mama-mani tangpaenga. Ua maming mande ra·ani gri uamangni gisiko sa·ataha” ine Marak parakataha.

Greneth M. Sangma, “Angni jikgipako WhatsApp-o namgija kattarangchi chonnike, watatenba, uni gisiko dal·bea dukniko on·enga. Uko mande ra·gija, jinmani mikkango donnugipa niamrangko pe·enga. Donnugipa kattarang aro kakketgija matnanganirangko dingtangate mesokna jotton ka·aha. Indian Constitution-ni Article 21-o on·gimin, Fundamental Right-ko pe·aha” ineba Marak janapataha.

Greneth Sangma-ni kamrangara niamko pe·ani, niam gita kakket bichalko pe·ani aro manderangni donnuaniko ruraani ong·a, ia kamrangchin”, ua angni jikgipako namen gisiko duk ong·ate, kratcha·ataha aro neng·nikaniko ra·baaha. Ia obostarang chingni nokdango janggi tanganirangba nangchakeaha” ine ua janapataha.

Greneth M. Sangma-ni kosako Bharatiya Nyaya Sanhita (BNS), 2023-ni niamrango pangchake ia counter FIR-ko register ka·china, Marak Pulis officer-ko didiataha aro Section 217 (tol·e u·iatani), Section 248 (tol·e matnangani), Section 356 (mingna gualani), Section 196 (manderangni gisepo mitchigrikaniko ra·baani), Section 79 (me·chikko chonnikani), Section 353 (manderangni gisepo golmal ka·ani aro tol·e u·iatani) BNS 2023, aro Section 66E, IT Act, 2000-o (donnuaniko pe·ani), ia niamrango pangchake counter FIR ka·doangaha.

“Angni jikgipani man·na nanggipa cholrangko chel·chakna aro mikkangchi maming dakeba saknaatani aro duk on·anirangko champengna gita sandirokaniko dakchina,” Marak dabiangaha.

Mikkangchi uandake, namgijagipa gisiko matnange, dorgasto-rangko galna man·jana gita nangchongmotgipa ja·kurangko de·china, bil gnanggipa officer-rang ia obostani bidingo ta·raken kamrangko ka·china, Marak Pulis officer-ko mol·molangaha.