Tura, Mar 5, 2025: South Garo Hills a·jao Tribal ong·gijagipa gipin manderang jelrorobaengahani gimin dolsa GOERA Nongalbibra Regional Unit, South Garo Hills jolrango jajrengsoaniko parakatenba, iani bidingo ta·raken am·sandianiko dakchina, South Garo Hills a·jani Superintendent of Pulis (SP)-ko didiataha.

GOERA Nongalbibra Regional Unit-ni parakatani gitade, South Garo Hills a·jani Nongalbibra jolrangona bading chiwalenggipa gipin jatrang re·baroroengani a·sel gipin jatrang jelrorobaengaha aro ia jolrango songdongenggipa Tribal manderangna, mongsongbate A·chikrangna kenchakani ong·engaha.

Nongalbibra jolrangona re·bae songdongenggipa gipin jatrang, Tribal me·chikrangko kal·akna aro dingtang dingtang ong·gija kamrangko ka·na cholrangko ra·enga. Batanggimin somoirango mande gimaani aro bia ka·gimin me·chikrangko bading chiwale cha·enggipa gipin jatrang seke katanirang aro uandake dingtang dingtang ong·gija kamrangko nikna man·engani giminsa ia jolrango songdongenggipa gipin jatrangko name am·sandichina GOERA Nongalbibra Regional Unit-ni dilgiparang, South Garo Hills a·jani SP-na sedoatgipa chittio janapataha.

Nongalbibra jolrango kam ka·e cha·enggipa gipin jatrangara joltangni manderangma ma gipin biaprangoni niam gri re·bae songdongenggipa manderangsama uko ma·sina gita licence-rangko, nangchongmota lekkarangko aro bading chiwalani kamrangko am·sandichina GOERA South Garo Hills a·jani SP-ko didiataha.

Iandake gipin biaprangoni re·napbaenggipa gipin jatrangko am·sandianirang dongjaengani a·selan jolo songdongkamgipa Tribal me·chikrang baksa ong·gija dakanirang batroroenga. Uni gimin Nongalbibra jolrango songdongenggipa Tribal manderangko naljokatna aro tribal manderangni namgnina ta·raken ja·ku de·aniko dakchina gitaba GOERA Nongalbibra Regional Unit, SP-ko mol·molataha.