Tura, March 5,2025: Bangladesh aro gipin a·dokrangoni Meghalaya a·dokona chong·motan Garo Hills-ona niam gri napsrukbaanirang batroroengani gimin niam gri napsrukbaenggipa manderangko champengsona, Meghalaya sorkarini 2016 bilsio ra·gatgipa, Meghalaya Residents Safety & Security (MRSSA)-ko nambate aro bilakbate jakkalchina Constitutional Rights Forum (CRF) Raksamgre Regional Unit, a·dokni Skotong Minister Conrad K Sangma-ko didiataha.

CRF Raksamgre Regional Unit-ni Skotong Minister-na sedoatani gitade, da·ororo sal somoirango Bangladesh a·songoni Meghalaya a·dokona niam gri napsrukanirang batroroengani gimin, a·dokni manderangna, mongsongbate Garo Hills-ni manderangna namen jajrengna nangani aro kenbeani ong·enga.

Gipin a·dokoni niam gri napsrukanirang batroroengani a·sel, Meghalaya a·doko aro Lower Assam-ni sima jolrango donggipa mitam biaprango manderangni jelbra jelsuaniko nikna man·enga. Uni gimin niam gri napsrukbagipa manderangko am·sandie, biaptangtangona watatpilna Meghalaya a·dokoba National Register of Citizens (NRC)-ko ra·gatchina CRF Raksamgre Regional Unit, Skotong Minister-ko didiataha.

Meghalaya aro Assam a·dok damgnio lekka pu·onenggipa manderangko champengna man·na gita 44-Raksamgre, 45-Tikrikilla, 46-Phulbari, 47-Rajabala, 48-Selsela, 53-Ampati 54-Mahendraganj jolrango donggipa constituency-rango pu·onenggipa manderangko name am·sandichina CRF Raksamgre Unit didiataha.

Meghalaya a·dokona manderangni napsrukbaanirangko nambate nirok sandina man·na gita MRSSA 2016-ko nambate jakkalchina CRF Raksamgre Regional Unit, a·dok sorkariko didiataha.