Tura, April 2,2025:: Tura Lower Babupara-o donggipa Garo Labor Corps-ni Cenotaph-ko gital dake rikpiltaina pe·e galanio adita meligrikgijanichi ba ku·monganirang dongjani a·sel kamrang ja·donggaae dongjachina Association for Democracy & Empowerment (ADE) Apex Committee, HQ Tura didiatenba, ua kamo pilak nanggnirangko dakchake on·china Committee-ni Chairman aro PHE Minister Marcuise N Marak-ko didiataha.
Ua cenotaph-ara, skanggipa A·gilsak Gimikni Dal·gipa dakgrikanio an·tangtangko on·kange France a·songona re·anggipa A·chik pagitchamrangko gisik ra·e, mande ra·na gita songe dongipa rong·te ba Cenotaph ong·achim. Uan A·chikrangna namen gamchatbegipa gam ong·a ine parakatenba, batanggipa salrango adita dolrang jegalani a·sel ua Cenotaph-ko gital dake rikpiltaiani ja·donggaatako man·enga. Iandake jatna mongsonggipa kamko ka·anio kamrang ja·donggaatako man·na nangja ine ADE-ni President Dalseng Bira Ch.Momin mol·molataha.
Uni gimin dingtang dingtang NGO-rang aro jatko dilgiparang baksa bakrime kamko ta·rake matchotatchina,
Committee-ni Chairman aro Cabinet Minister Marcuise Marak-ko ADE didiataha.
A·chikrangni gamchatgipa Cenotaph-ko ripingna aro rikpiltaina gita, ADE bakrimpaaniko on·atenga ine janapatenba, ja·donggae dongenggipa kamara kraani ong·ja ine ADE-ni President, pilak NGO-rangkon ua kamo bakrimpachina didiataha.
Gitcham Cenotaph-ko pe·gale gital dake rikpiltaianio ADE chol man·a dipet bakrimaniko on·na kusi ong·a, indiba ua Cenotaph-ko rikpiltaianio adita meligrikgijanirang ong·katani a·sel, mongsonggipa kamna chamgimin tangka paisarangko gipin kamrangna jakkalsretnaba gnang. Uni gimin ua Cenotaph-na chamgimin tangka paisarangko gipin kamrangna jakkalaretjachina aro maming dongnuani gri kamrangko matchotatchina Momin mol·molataha.
