Tura, Mar 8,2025: Assembly Session-o, Winter Capital Motion-ni somoio Tura-ko Winter Capital songchina dabitokengani bidingo nipilaniko dakna gita resolution-ko ra·china gita a·dok sorkariko didiani pal Garo Hills-ni bang·bata MLA-rangan jegaltokahani gimin A’chik Conscious Holistically Integrated Krima (ACHIK), Garo Hills-ni MLA-rangko matnangataha.

Garo Hills-ni MLA-rang u·itokjani gimin kratcha·chakko janapatenba, daitoko ra·na sikjanina A’chik Conscious Holistically Integrated Krima (ACHIK) raken matnangataha, jemangan Garo Hills-ni manderangchi seoke watatako man·eba, MLA-rang an·tangtangni bilgrianiko aro ka·donggijaniko parakaha. Ian political dilgiparangni bilgrianisan ong·aija, indiba Garo Hills-ni manderangni nangnikaniko aro bilko chonnikani gita ong·a, ine ACHIK Council matnangaha.

Assembly-o, Garo Hills-o songdongenggipa manderangni palo ku·rang on·ani pal, Garo Hills-ni manderangna apsan bak rengsiko aro kakketko ra·baani pal batesa Garo Hills-ni manderangko ga·pakgale an·tangtangni Political man·gninasa mikpakma nitokaha ine ACHIK Council matnangataha.

Constituency-tangtango manderangni bil aro nangnikanina dakgrikchakani pal, political-ni gita sinjetanirangna an·tangtangko bame on·aha.

Jattang a·songtangko cha·boke maming saloba gualjawa aro je MLA-rangan Tura-ko Winter Capital songchina dabiani bidingo chanchimitingon jegalani kattarangkosa aganaha. Uamang sakprakprakni bimingrangko manderangna de·e minge mesokgen aro uamang ia Winter Capital-na dabianiko maina jegalachim talate on·na nanggen, ineba ACHIK krengataha.

Tura-ko Winter Capital songchina kingkot dabiangkugen. Meghalaya-o sason ka·aniko ra·rone nirokatchina Governor, Indiani President aro gipin constitutional body-rango mol·molgen ineba ACHIK parakataha.