Shillong, May 21, 2025:A·dokni damgittam Autonomous District Council (ADC)-rang, chong·motan Khasi Hills Autonomous District Council (KHADC), Jaintia Hills Autonomous District Council (JHADC) aro Garo Hills Autonomous District Council (GHADC)-ni ning·o donggipa Urban Constituency-rangna 15-gipa Finance Commission-ni namgnirangko on·na man·na gita Monggolbar salo, a·dokni Deputy Chief Minister aro District Council Affairs (DCA) Minister Prestone Tynsong-ni dilanichi, damgittam ADC-rangni dilgiparang aro official-rang baksa tom·e chanchirimaniko dakanggaha.

Ua tom·aniko ong·atani bidingo kobor ra·timgiparangna talatangengon, ADC-rangna 15-gipa Finance Commission-ni Recommend ka·gipa grant-rangko on·ani bidingo chanchirimaha, indiba damgittam ADC-rangni ning·o ga·akgipa sonjinmarang, mongsongbate Shillong, Jowai aro Tura-na ia Scheme-rangko sokatanio bang·a neng·nikanirangko chagrongenga ine Tynsong aganaha.

15-gipa Finance Commission-ni Recommend ka·gipa Scheme-rangara mongsongbate songadam nokadamrangnasa ong·bataia aro town-rangna on·na gitade mamingkon janapa dongja. Town-rangoba ADC-ni mitam Constituency-rangko man·chapahani gimin, jajaaniko ong·atenga. 15-gipa Finance Commission-ni grant-rangko ADC-ni ning·o ga·akgipa Urban Constituency-rangna sokatna man·na gita iani bidingo cholrangko sandichina a·dok sorkari, Urban Affairs Department-na pakwate on·angaha ine Tynsong parakataha.

“Chinga da·alo damgittam ADC-rangni Department-rang baksa ning·tue chanchirimaha aro cholrangko sandichina chinga Urban Affairs Department-na pakwatangaha. DCA-ni Commissioner & Secretary-ko iani bidingo ADC-rang baksa kobor ra·grikchina ge·etangaha,” ine Deputy CM aro DCA-ni Minister aganaha.

Iani bidingo somoirangko tik ka·jaha, indiba ADC damgittamkon ta·rake kam ka·china ua didiangaha “15-gipa Finance Commission-ni term, re·baenggipa 2026 bilsini March jao bon·engahani gimin ta·raken kamrangko ka·china anga damgittam ADC-rangkon aganaha. Ia grant-rangko man·na gita da·o adita jarangasan dongaiaha. Uni gimin ia grant-rangko Urban Constituency-rangni MDC-rang man·aniko chinga nangnikenga,” ineba ua agandapataha.

Ian da·o dipet matchotsranga ong·kuja aro chanchirimna nanganirang dongkuenga ineba DCA Minister parakataha.