Tura, May 21,2025: West Garo Hills a·jani Selsella C&RD Block-ni ning·o donggipa Haldibari Higher Secondary Skulo Garo skigipa dongjani gimin Garo subject-ko poraienggipa chatro chatrirang neng·nikaniko chagrongenga ine Selsella jolni nangrimgimin dingtang dingtang NGO-rang chongmotan, All Selsella NGOs Alliance (ASNA) parakataha.

Ua skulo ta·raken Garo skigipako rakkichina, West Garo Hills, Skul Education & Literacy-ni Joint Director-na sedoataha.
Iani bidingo Skul Education & Literacy-ni Joint Director-na seachi u·iatenba, Haldibari Higher Secondary skulo Class XI aro Class XII-ko poraienggipa chatro chatrirangni Garo MIL aro GSL-ko ra·gipa chatro chatrirang bang·en dongachim, indiba Garo skigipa dongjani a·sel chatro chatrirang neng·nikaniko man·tokenga ine ASNA parakataha.

Skulo Garo subject-ko skigipa dongjani a·sel chatro chatrirangni poraianirango nangchakeaniko man·enga. “Indian Constitution-ni Article 350A-ni ning·o ku·siktangko skie ra·na biko on·anahani gimin Haldibari Higher Seconday skulna Garo skigipako ta·rake seokna ja·kurangko de·china chinga didienga,” ine All Selsella NGOs Alliance, Skul Education & Literacy-ni Director-na seatgipa chittio parakataha.