Chokpot, April 2, 2026: South Garo Hills a·jani Chokpot jolo donggipa songrango rama jal·langrang namjani a·sel, wachini somoio bang·a neng·nikanirangko man·tokenga ine GSU Chokpot Regional Unit-ni General Secretary Spensar R Sangma parakataha.

Chokpot-oni Gasuapara-ona dakanggipa rama jal·lang dongjani a·sel jolni manderang wachi karini somoio chibimako ga·tbatna dollong dongjae, an·tangtangni motor bike-rangko mandechisa chilbatenga. Indake bang·a neng·nikanirangko chagronge janggi tangna nangenga, ine janapatenba, Chokpot jolo MLA aro MDC seoke watatani maming namgni dongja ine Sangma parakataha.

Ia obostarangni bidingo Chokpot-ni MLA Sengchim N Sangma maming nirok sandianirangko dakjaenga ine GSU Chokpot Regional Unit matnangaha.

GSU Chokpot Regional Unit-ni General Secretary-ni parakatani gitade, re·anggipa 2023 aro 2025 bilsirangon uamangna ia neng·nikanirangko janape, a·dokni Skotong Minister Conrad K Sangma-na sesoatahachim, indiba da·alona kingkingba namdapatna aro rama-jal·lang tarina mamng ja·kuko de·kujaenga.

Gambegre Constituency-ni ning·o ga·akgipa, Sangknigre song sambao donggipa Dankipara-oni Balikimgre aro Ronjugre-ona kabatgipa Hanging Bridge namsrangjani a·sel, songni-nokni manderang, skul aro college-rango poraienggipa chatro-chatrirang namen neng·nikaniko man·enga. Ia dolongara songo-noko donggipa poraienggipa bi·sarangna wachini somoio chi ga·batna altue man·na gita tarigipa ong·achim aro iarangko nambate tarina sorkarioni maming ja·ku de·aniko dakkujaenga ine ua janapenba. ua jol-ara a·dokni Skotong Minister Conrad K Sangma-ni jikgipa Mehtab Chandee A Sangma-ni man·gipa, 56-Gambegre Constituency-ni ning·o ong·a ineba parakataha.

Uandake, Baromile-oni Chokpot-ona tarienggipa ramakoba Baromile-oni Sandong Songma-onasan tarie donengani gimin, salantio re·ruaenggipa manderangna namen neng·nikani ong·enga. Una aganenba, Sandong-oni Chokpot antiona tarina nangenggipa rama tong·sako, maini gimin da·onaba man·kujaenga ine Sangma, Skotong Minister-ko sing·doataha.

Una agreba, Chokpot-oni Karukol-ona rama tarina chamatgipa gong kror 156 tangkarangni maming kobor dongkujaenga. Ia ramako tarina tangka chamatbebeama ma Chokpot-ni manderangko togie roengasama, ineba ua sing·doanirangko dakangaha.

Songo noko rama jal·langrang namjani a·selan, bang·a neng·nikanirangko man·engoba, uamangna mingsasikba kamrangko chu·sokate on·naniko nikkujaengani gimin, Chokpot jolni manderang da·o ong·enggipa sorkarina maming ka·donganian dongja ine GSU Chokpot Regional Unit-ni dilgipa matnangataha.