Baghmara, Oct 7, 2024: Garo Hills gimikon dondikgija mikkarang waanichi South Garo Hills a·jani Chokpot jolrango Dareng Chibima dal·bae, bang·a songrangkon chi mripaha aro bang·a songrangon, a·arang be·e, te 16 nok jamrang nosto ong·aha, ine GSU Chokpot Regional Unit parakataha.
GSU Chokpot Regional Unit-ni President Jish A.Sangma-ni parakatani gitade, Chokpot jolrango chi banani a·sel Silki aro Rambragre songrango nok te 30-ni manderang neng·nikanirangko chagrongna nangtokengaha aro ia jolrango network-rang aro rama jal·langrang namjani a·sel, songsa songgipinrang baksa name kobor ra·grikna man·jaha.
Indake ong·engon, chirang bananichi aro a·arang rurongdapanichi neng·nikanirangko man·enggipa biaprangona, Sonibar salo GSU Chokpot Regional Unit-ni dilgiparang, Chokpot-ni MLA Sengchim N.Sangma, Chokpot-ni BDO JN Sangma aro pulis officer-rang baksa re·ange, cha·ani bosturangko suale on·eaha.
Chokpot jolrango rama jal·langrang namjani a·sel, Chokpot jolni pilak biaprangonade re·ange dakchakanirangko on·na gita man·jaha ine GSU Chokpot Regional Unit-ni President parakataha.
