Tura, Dec 3, 2024: Northeast Indigenous People’s Association (NIPA)-ni General Secretary Bostone M.Sangma, NPP-ni National Vice President aro Manipur a·dokni gitcham Deputy Skotong Minister Yunam Joy Kumar-ko grongeaha, ine u·iataha.
Bostone Sangma-ni Yunam Joy Kumar-ko grongeani miksongara, Manipur a·doko so·sojengjeng kajia golmal ong·e, tom·tomaniko man·jaengani a·sel, tom·tomaniko ra·bapilna ku·mongrimaniko on·china mol·molangaha.
“A·songo tom·tomani donggenchimode, jat aro a·ssong namen silrorona mangen. Mikkangchi an·chingni chadamberangba poraianirango namrorona man·gen, uarangna namgipa janggi tangani cholko on·na nangenga” ine NIPA-ni dilgipa parakataha.
Y Joy kumar jinama aganchakatani gitade, “Chinga Manipur a·doko tom·tomaniko ra·bapilna namen jotton ka·enga aro apsan daken tom·tomaniko ra·bapilgen. Na·simangni indake chingona re·bae, mol·molanina namen kusi ong·a aro na·simangni jak on·panina namen mittela” ine aganataha.
“Chinga BJP-ni State Vice President Laishram Meenabanta naba indake lekka seataha. Chinga Northeast Indigenous People’s Association-ni gita na·simang BJP-ni dilgiparangko mol·molatpaenga. Manipur a·doko tom·tomaniko ra·bapilchina aro jatsa jatgipin baksa meli nangrimgrike janggi tangna, an·ching saksa sakgipinko mande ra·grike apsan ku·monge, songdongna aro Nokgipani on·gimin a·gilsako tom·tome janggi tangna” ine Sangma mol·molataha.
