Dadenggre, May 22, 2025: West Garo Hills a·jani ning·o donggipa, Dadenggre Civil Sub-Division-ko 1982 bilsion songe on·ahani gimin, ian a·doko gitchambatsranggipa Sub-Division-rangoni ge·sa ong·enga aro ia Sub-Division-ko District songe on·china 1999 bilsionin dabibaenga, indiba bilsi 26 ong·piloba da·alonan chu·sokate on·chipkujaenga ine Garo Students’ Union (GSU) Western Zone (North) Dadenggre, suk ong·gijaniko parakatenba, iani bidingo a·dok sorkarina gisik ra·atpiltaianiko on·ataha.

Dadenggre-ko District songe on·china dabiengani bidingo sorkarina gisik ra·atpiltaianiko on·atengon, batanggimin bilsi 26-na Dadenggre-o songdongenggipa manderang, Dadenggre Civil Sub-division-ko district songe on·china dabiengachim, indiba dingtang dingtang sorkarirang, ia dabianiko da·onan chu·sokate on·chipkujaenga. Ian politics-ni gita aro badiaba political dolrangni election-rango dabiani ong·ja, indiba manderangni nangnike dabianisa ong·enga ine GSU-ni President Tengsan M Marak parakataha.

Dadenggre Sub-Division-ni ning·o chu·onga biaprang gnang aro bang·bata songrangan Tura-oni namen chel·grikani gimin, Dadenggre jolni manderang pilak kamrangnan Tura-chi re·a doanio namen neng·nikanirangko chagrongna nangenga. Uni gimin Dadenggre-ko district songna nangchongmotenga, ine parakatenba, iani bidingo dingtang dingtang dolrang changni chang lekkarangko sedoataha aro jolo songdongenggipa manderang baksaba tom·e jingjengatanirangko dakaha, indiba da·alona kingkingan ia dabianiko sorkari chu·sokate on·kujaenga ine Marak parakataha.

Dadenggre jolni manderang bilsi 26-na kingking chakchike sengengaha, indiba Dadenggre jolo songdongenggipa manderangni dabianiko sorkari knachakgija dongenga. Uni gimin manderangni nanganikaniko chu·sokate on·ani somoi ong·engaha. Maina batanggimin 2021 bilsio Khasi Hills a·jaode, Mairang-ko District songe, Eastern West Khasi ine bimungko don·aha aro ua somoioba Dadenggre-kode watchangskaha ineba GSU dilgipa parakataha.