Guwahati, Sept 6,2024: Assam-ni Chirang district-o bilsi 16 ong·gipa me·chik bi·sako sak 6 chadamberang drae til·ekaha aro uarangoni sak 2-de bilsi sokkugijagipa chadamberang ong·achim.
Koborni gitade, dos dakgipa chadamberang September 4 tarik Butbar salo ua me·chikko kratcha·atna namgijagipa kamrangko video record ka·e, WhatsApp group-rango wataha ine pulisna ku·rachakaha.
Ia mamlani bidingo me·chikni ma·gipa pagipa badi ka·ani ja·man, dos dakgipa sak 6 chadamberangoni sak 5-ko pulisrang rim·aha.
Ia a·sel re·anggipa August jao Indo-Bhutan sima ari sepang jolo donggipa Chirang a·jani Bengtol minggipa songo ong·aha.
Me·chikni ma·gipa pagipani badi ka·anio janapani gitade, dos dakgipa chadamberang me·chik bi·sako ka·mikkenatahani gimin, me·chik bi·sa an·tangna ong·a obostako darangnaba parakjaha.
Iani bidingo Protection of Children from Sexual Offences (POCSO) Act aro Bharatiya Nyaya Sanhita (BNS)-ni dingtang dingtang section-rango pangchake pulisrang mamlako segataha aro pulisrang sing·sandianiko dakenga ine parakaha.
