Tura, Sept 6, 2024: A·songni dingtang dingtang biaprango chang 63-gipa Teachers Day-ko maniengon, Tura-oba District Auditorium-o maniangaha aro ia salko manianio, Meghalaya Board of School Education (MBOSE)-ni Executive Chairman, CP Marak, mongsonggipa sokgipa ong·e bak ra·angaha.
Ia Skigiparangni salko manianiengon, MBOSE-ni Controller of Examinations TR Laloo, Skul Education & Literacy-ni Joint Director RTK Sangma, Sub-Divisional Skul Education Officer (SDSEO) Samuel Ch. Marak, Dadenggre-ni SDSEO ED Sangma, dingtang dingtang department-ni Official-rang, Principal-rang, skigiparang, chatro chatrirang aro gipinrang bak ra·angtokaha.
Indake tom·anio, MBOSE-ni Executive Chairman CP Marak, jinmana aganprakangengon, an·tangtangko on·kange skigipani kamko ka·engani gimin skigiparang pilakkon mittelpilangenba, ia salo Award man·gipa skigiparangna an·tangni namgipa skaniko on·angaha.
Songsalo mandeko saksa chanchina changgipa aro songsalna on·gilgipa ong·atanio skigiparangni kamrangko ua tom·anio parakangaha.
Ia salrango skigiparang dingtang dingtang neng·nikanirangko chagrongna nanggenchimoba, mikkangchi chatro chatrirangko mande ong·atna gita an·tangtangko on·kange kamko ka·angkuchina gita Marak, skigipa sakantikon didiangaha.
Ia bilsini State Award-ko man·gipa West Garo Hills a·jani skigiparangara, Tura Don Bosco Higher Secondary Skul-ni Assistant Teacher Subrata Sen aro Tura Balsrigittim LP Skul-ni Head Teacher Miman M Sangma ong·a aro District Award-ko man·gipa skigiparanga, Dalu Sacred Heart Deficit Secondary Skul-ni Headmaster Rev Fr Biju Paul, Shyamnagar Govt UP Skul-ni Headmaster Utpal Kr Laha aro Ampanggre Govt LP Skul-ni Assistant Teacher Alithson G Momin ong·a.
Best Scout Master-ni Award-ko Tura Scouts Open Unit-ni Scout Master Suraj D Marak-na on·aha, Best Guide Captain-ni Award-ko Tura Christian Girls HS Skul-ni Assistant Teacher aro Guide Captain Benjish N Marak-na on·angskaaha.
District Auditorium-o jinma tom·e skigiparangni salko manina skang, skultangtango skigiparangko mande ra·pilskana gita dingtang dingtang program-rangko ong·attokaha.
Apsan daken, ia chang 63-gipa Teachers Day-ko South West Garo Hills a·jaoba maniangaha aro ia salo award man·gipa skigiparangna dingtangmancha mande ra·pilskaanirangko dakangaha.
Ia Teachers Day-ko South West Garo Hills District Skul Education Office-ni gita Ampati-ni Multi Facility Centre-o manidilangaha aro ia salko manianio, Mahendraganj-ni MLA Sanjay A Sangma, mongsonggipa sokgipa ong·e bak ra·angaha.
Ia skigiparangni salko manianio Award-rangko man·gipa skigiparangara, Boldamgre Deficit Secondary Skul-ni Assistant Teacher Sanjib A Sangma, Ampati Deficit UP Skul-ni Headmaster Grebingham B Sangma aro Kukurmua Govt LP Skul-ni Headmaster Jahan Miah ong·a.
Una agreba, Garobadha-o donggipa St Dominic Savio HS Skul-ni Assistant Teacher aro Scout & Guide Teacher Victor Dorana T Sangma-na Best Scout Master aro Ampati-o donggipa Birin Nuchong Sec Skul-ni Assistant Teacher aro Guide Captain Silje Ch Momin-na Best Guide Captain-ni award-rangko on·angskaaha.
