Tura, Nov 2, 2024:Tura-ni MDC aro BJP-ni State Vice President Bernard N.Marak Gambegre Assembly by-election-o BJP-ni candidate ong·e susaengon, mai miksonganio susaengachim, Gambegre jolni manderangna ku·rachakanirangko parakataha.

Bernard Marak-ni Gambegre by-election-na ku·rachakanirang ‘Cha·bokagri A·songko Rikani’. Cha·bokagri A·songko rikna, Second Secretariat aro Second Capital-ko Garo Hills-o songna aro A·chikrangko nirok simsake re·dilna. A·chikrang Reservation-ko pe·na on·jawa. Songni manderangna ma·mongni sorkarini on·atenggipa scheme-rangko sokatna aro Gambegre constituency-ni ning·o ge 5 Voter Empowerment Centre-rangko songgen. Ia centre-rango songni manderangni nangnikani aro neng·nikanirangko niroke manderangna dakchake on·gen, jedakode saksaba galchangako man·jawa.

A·kingni Sorkari, ma·mong sorkarini dakchakachi A·king ge·antio A·kingni Sorkariko rikgen aro Nokmarangni dilanichi songko nirokna, warachakna, sason ka·na aro songni nanganirangko niroke namroro-silroroatna, A·king ge·antion ia sorkariko rikgen. Ia A·king Sorkari Skul, Dispensary aro ma·mong sorkarini sheme-rangko jako ra·e kam ka·na gita man·gen. Job Card-ko sal 100-oni sal 150-ona ra·doatna aro salprakni hajirako gong 238-oni gong 300-na bariatna ja·ku de·gen. Job Card-ni tangkarangko gongsaba gimaatna on·jawa aro somoi gita online payment-ko sokatgen aro supply-ni tangkako 50% kattina on·jawa. Primary Skul aro Health Centre-rangko nambatatna aro chadamberangna kam ka·e cha·na cholrangko on·na ja·ku de·gen.

Jatni Bewalko Ripinganggen, 8-gipa Schedule-o A·chikku·ko napatna jotton ka·gen, jedakode ku·tangchi gimikko ka·na man·gen. Songo noko jatni bewalchi bichal ka·ani, daka rikanirangko ripingani aro ku·tangko ripingani cholrangko bariatgen. Nokma Laskar-rangni bilrangko bilakate sorkarini napdrae a·kangani aro sason ka·anirangko champenggen. Gambegre Constituency-ni ning·o jatni daka-rikani bewalrangko ripingna dal·gipa Gambegre Cultural Festival-ko ong·atgen aro ma·mong sorkarini dakchakanichi tourism-ko tang·doatna kam ka·gen. Wangal-susaani aro gisiko nanggiparangna git ring·susaani, chroksusaani aro dingtang dingtang susaanirang aro an·saoatanirangko ong·atgen. Chadamberangna ku·chakgimin lak 5 kamrangko sorkarioniko am·e on·gen.

Kangal Cholgrirangna nambata chol, kangal cholgrirangna ma·mong sorkarini nambatgipa cholrang jekai job card, nok, ringani chi, bijoli, pension-rang, loanrang aro gipin janggi tangani cholrangko apbalbate sakantina sokatgen. Bilsi 60 batgipa budepa, butchuma, segri ma·giparang aro be·enni gita chu·sokgijagiparang sakantian pension-rangko man·gen. Hajal 5000 bate nokdangrangna PMAY nokrangko rike on·gen aro nokantinan chi, paikana aro ration-ko sokatgen.

Game ge·e cha·giparangna, Farmer Producer Organisation (FPO)-rangko tarie game ge·e cha·giparangna nambata cholrangko ra·bagen. Biming segatgimin game ge·e cha·giparangna jao gong 500-ko on·gen. Jile kae cha·na gita wak,do·o, do·bok aro matchurangko National Livestock Mission (NLM)-ni gita sokatgen. Chi donggipa biaprango na·tok jilanirangko dakdilanggen. Me·su samjak ge·na aro ramasamo me·su palgiparangna loanrangko on·gen. Processing Unit-rangkoba adita biaprango songgen, jedakode game ge·e cha·giparangna dakchakani ong·gen. 50% na bate Minimum Support Price (MSP)-ko dakchina sorkariko didigen, jedakode gue, kaju, e·ching, holdi aro uandakgipa dam dakchepna man·jawa. Gama ge·anirang nosto ong·ode, uarangna insurance dakna gita dakchakgen.

Chadamberangna poraia Bida dongani kri kamrangko bikote on·gen. Jemangan poraina man·jaha ua chadamberangna dingtang dingtang janggi tangani cholrangko bikote on·gen. Training aro loanrangko on·e janggi tangna dakchakgen. Kal·na changgiparangna club-rangko register ka·e, dingtang dingtang man·anirangko sorkarioniko man·e on·gen. Homestay aro jilla kem·anirangko dakna gisiko nanggipa chadamberangna dakchakgen.

Chatro chatrirangna, Skul bi·sarangna scholarship-rangko a·bachengatgen aro matric semangipa bi·sarangna scholarship-rangko on·gen. Skulrangko namdapatna kal·chakramrangko tarie on·na aro computer-rangko ra·e on·gen. U·ianio doka dam·ani aro kal·susaanirangko bang·e ong·atgen. Eklavya Skul, Community College aro Residential skulrangko a·bachengatgen. Skie ra·anirangko apbalbatatna educational aro cultural tour-rangko chadamberangna ong·atgen. Saobarang poraina chol ong·jaode, uarangko poraiatgen.

Kal·susaani, ge 50 sports aro recreation centre-rangko tarie on·gen. Be·en bimang bilakani aro an·seng baljokanina nanggipa kal·ani bosturangko ra·e on·gen. Skul aro songni field-rangko Stadium tarigen aro kal·susaanirangko bang·bate ong·atgen. Me·chikrangnaba kal·susaani cholrangko apsan dake on·gen.

Development, medical college-ko ta·rake matchotatgen. Indian Institute of Technology (IIT)-ko Gambegre Constituency-ona ra·bana ja·ku de·gen. Game ge·e cha·giparangna marketing hub-rangko kulie on·gen. Km 300-na bate songni ramarangko tarina ja·ku de·gen, jeon songni manderang kam ka·e cha·na chol man·gen. Poster Bankingrang aro ATM facility-rangko a·bachengatna gita raken ja·ku de·gen.

Sagiparangko sanna banani cholrang, Gambegre Constituency-ni ning·o Trauma Centre-ko NH-5-o rikgen. Sagiparangko salna ambulance ge 5-ko dingtang dingtang jolrango dongen. Ayushman Bharat Card-ko gimiknan on·gen aro sananirangko ma·mong sorkarini tangkachi sangen. Cancer sagiparangna dingtangmancha dakchakaniko on·gen.

Current ba Bijolini bill-rangko jaanti gamna nanganirang bang·bate sokgenchimode, uarangko nipile komiatgen. Je biaprangona current ba bijoli sokkuja, ua songrangona bijoliko sokatgen. Je biaprangona bijoliko sokatna neng·nikani dongachim, ua biaprango PM Surya Ghar Bijili Yojana-chi current ba bijolini bill-ko jaanti gamna nangani gri solar-chi bijoliko jakkalna dakchakgen.

Self Help Group (SHG), ma·giparangko dakchakna “Didi Lakhpati” scheme-ko a·bachengatgen. National Rural Livelihood Mission (NRLM)-ni gita aro gipin scheme-rangni gitaba ma·giparangni group-rangna bang·a dakchakanirangko on·dapna jotton ka·gen. Mirong Contol-rangkoba SHG-rangchi chalaina didigen. Ma·giparangni songsalna kam ka·ani bilongen gamchata.

Janggi tangani cholrang, janggi tanganiko namdapatna bang·a cholrangko loan-rangchi jekai MUDRA, PMEGP, PMFME, Standup India aro uandakgipa scheme-rangoniko ra·china dakchakgen. Electric Auto, Electric Scooty-rangkoba ra·china didigen. Dokkan, Homestay, Resort uandakgiparangko dakchina dakchakgen. Jedakode, tourism baksana songdongenggipa manderangni janggi tanganiba tang·dona gita man·gen. PMFME-chiba food processing unit-rangko gisik nanggiparangna kulie on·gen.

Ia nambegipa miksonganirang baksa ku·chakanirangko Marak Gambegre by-election-na parakataha.