Baghmara, Nov 1,2024: FKJGP Gasuapara Circle, South Garo Hills a·jao ong·gija kamrangko ka·e, niamgri bol badingsrukanirangko champengatchina, October 31 tariko Dimapara Check Post-ni Officer In-charge-na sedoataha.

FKJGP Gasuapara Circle-ni General Secretary Kalsrang M.Marak-ni koborna u·iatani gitade, dollong rikna bol salangenga ine tol·enba, niamgri Assam-ona bolrangko badingsrukatenga.

South Garo Hills a·jani Gasuapara C&RD block-ni ning·o donggipa Rugapara joloniko Assam a·dokona niamgri mahindra pickup garirango bolrangko walo badingsrukatenga ine Kalsrang Marak parakataha.

Indake niamgri maming nangchongmotgipa lekkarang gri bolrangko cha·ue walni somoio badingsrukatenga ine parakatenba, walo niamgri bol salgipa pickup garirangko pangnan chotchanggija walanti nirok sandianiko dakchina aro ong·gija kamrangko ka·enggipa manderangko rim·enba, uamangni kosako niam gita sastirangko on·china Kalsrang Marak didiataha.