Tura, May 6, 2025: Mongolbar salo a·dok sorkari, Operations & Maintenance (O&M) & Communications, Navigation & Surveillance (CNS) ba Air Traffic Management (ATM)-na Airports Authority of India (AAI) baksa Baljek Airport-o ge 20 asongchakani donggipa sildoreng ba 20 seater Aircraft-ko chalaina aro Airport-ko dal·batatna gita soi ka·grikaha.

Baljek Airport-o ATR-72 gita dal·kalgipa sildorengrangko chalaina man·na gita Baljek Airport-ko dal·batatanian a·dok sorkarini miksongani ong·achim.

AAI-ni official-rang, a·dok sorkarini on·dapgipa a·a acre 56.5-o pangchake 2010 aro 2017 bilsio tarigipa Detailed Project Report (DPR)-rangko sorkarina on·angjolaha.

Baljek Airport-ko nambate tarina gita jako ra·china a·dok sorkari, AAI-ko mol·molahani gimin, AAI-ba Baljek airport-ko jako ra·na kusi ong·aniko parakangaha. Indiba, skang Phase I-na on·gipa acre 56.5 a·arang baksana acre 125 a·arangko Phase II-na acre 115 a·arangko on·dapchina, a·dok sorkariko mol·molangskaaha.

Garo Hills-ni Baljek Airport-o ge 20 asongchakani donggipa Aircraft-ko chalaina aro airport-ko dal·batatna gita AAI baksa soi ka·grikanio a·dokni Skotong Minister Conrad K Sangma, jinmana aganprakengon, ia airport-o dal·dalgipa sildorengrangko bilatna sorkari niksamsoani donga aro iani bidingo airport-ko dal·bate tarina nangdapenggipa a·arangko ra·na kamrangko ka·engaha ine aganangaha. Ia kamrangko ru·utate donggija ta·raken kamrangko matchotatchina, West Garo Hills a·jani Deputy Commissioner Vibhor Aggarwal-ko didiangaha.

Baljek Airport-o seat ge 20 donggipa sildorengrangko chalaina AAI, baksa songgrike soi ka·grikanio, Meghalaya Industrial Development Corporation (MIDC)-ni Chairman James Pangsang K Sangma, Dadenggre-ni MLA Rupa M. Marak, West Garo Hills a·jani Deputy Commissioner Vibhor Aggarwal aro AAI-ni official-rangba dongpae bak ra·angaha.