Baghmara, March 12, 2025: Baghmara Citizens Forum (BCF) da·al salni bako chong·motan March 12 tariko, Baghmara-o songdongenggipa manderangni china neng·nikrorobatengani gimin, maimancha dake, Lotnagar-o donggipa Baghmara Greater Water Supply Scheme-ni dal·gipa chirongdik (tank)-ona chi komie jokbaenga aro maidake manderangna chi chu·ongjaenga ine sandianiko dakaha.

BCF-ni dilgiparang Siju Rongdong-oniko Baghmara Lotnagar chirongdikona salbaenggipa pipe siltong banoba nosto ong·ama ine sandiangon, Baghmara Greater Water Supply-ni dal·gipa siltongko su·ponge bang·a dingtang dingtang songrangna JJM-ni contractor pipe line-rangko teke ba sale on·anirangko nikaha.

Iani bidingo BCF aro GSU baksa Baghmara-o songdongenggipa manderang da·alo tom·aniko ong·ate, RTI ka·na tik ka·angaha aro da·al salni gisepon, South Garo Hills a·jani DC-na lekka sedoangenba uko gronge chanchirimaniko dakaha. BCF, GSU aro FKJGP-ni dilgiparang, DC baksa chanchirimenba, ta·raken niam gri Baghmara Greater Water Supply-ni siltongko su·ponge, JJM-na jakkalani bidingo sandianiko dakchina didiangaha.

“Uni gisepon, ta·rake sandianiko dakja ong·ode, re·baenggipa March 17 tarik Sombar saloni Office Picketing ka·angskagen ine GSU Southern Zone-ni dilgiparang aganon, DC committee ge·sako songe Joint inquiry-ko ta·raken dakna ku·rachakataha” ine BCF-ni dilgiparang u·iataha.

Uni ja·mano BCF aro GSU, FKJGP-ni dilgiparang, PHE-ni Executive Engineer-koba gronge, Baghmara Greater Water Supply-ni pipe siltongko su·ponge JJM-ni pipe line-rangko sale on·na gita niam dongama aro sawa ge·eta ine sing·on, PHE-ni Executive Engineer (EE) niam dongja aro ua pipe siltongko su·ponge JJM-na jakkalbo ine anga ge·eta dongja ine Engineer aganchakaha. Indakmitting somoio JJM company-ni contractor-ko okamate sing·on, PHE-ni Junior Engineer, Standborn order on·a ine contractor aganaha. “Chinga ta·raken JJM-na jakkalenggipa pipe line-rangko bon ka·atgen ine Engineer aganahaon, da·ode sengkubo, DC joint inquiry ka·chengna am·enga, uni ja·mano JJM-na jakkalenggipa pipe line gimikkon bon ka·na nanggen” ine BCF aro GSU, Engineer-ko aganaha.

Indake niamgri Greater Water Supply-ni chiko cha·ue, JJM-na jakkalengani a·sel Baghmara jolni manderang ringani china namen neng·nikaniko man·tokenga, ine janapatenba iani bidingo mikkangchi rakbate ja·kurangko de·anio Baghmara-ni dingtang dingtang NGO-rangba bakrimenga ine BCF-ni dilgipa saksa Chavan N.Sangma parakataha.