Baghmara, Jan 10, 2025: Hans Foundation-ni Baghmara Civil Hospital-na dakchake on·gipa Dialysis Unit-ko Tura-ona ra·jitangna miksongenganiko Garo Students Union (GSU) Southern Zone (SZ), Baghmara jegalatenba, Baghmara Civil Hospital-ni Dialysis Unit-ko gipin biapchi apjitangna on·jawa ine parakataha.

GSU SZ-ni u·iatani gitade, adita salrangna skang uamang, Baghmara Civil Hospital-ni Medical Superintendent-ko grongenba, National Health Mission (NHM)-ni Mission Director-ni seatgipa chittini bidingo raken jegalataha.

“Baghmara Civil Hospital-ni Dialysis Unit-ko gipin biapchi ra·jitangna manchianiko chinga raken jegalenga, maina Baghmara Civil Hospital-ni Dialysis Unit-ara South Garo Hills a·jao songdongenggipa manderangna namen nangchongmotgipa ong·enga. Iako jolni manderangnasa kulie on·aha aro iako gipin biapona ra·jitanggenchimode, Baghmara aro uni wilwilao songdongenggipa manderangna on·gimin cholko ra·sekani gita ong·gen” ine GSU parakataha.

Hans Foundation-ni on·gipa Dialysis Unit-ara jolni manderangna namgnina on·gimin gam jinsa ong·a, “A·dokni Tura-ko man·chape a·ja ge·antion Dialysis Unit-rang donga aro ia Dialysis Unit-ko Baghmara Civil Hospital-oniko gipin biapona ra·jitangjitatgenchimode, chel·a biaprangona re·ange sanna bananiko dakpana chol ong·gijagipa jolni manderangna neng·nikanirangko ra·bagen” ine janapatenba ia Dialysis Unit-ko ra·jitanggija Baghmara Civil Hospital-on donangkuchina GSU Southern Zone dabiangaha.