Tura, May 7, 2025: A·chik Youth Welfare Organisation (AYWO) Central Executive Body (CEB) Tura, Garo Hills-ni Tribal Contractor-rangna on·gimin kamrangko den·galpilahani gimin jegalatenba, iani bidingo sandianiko dakchina aro Tribal ba A·chik Contractor-rangna kamrangko on·piltaichina dabie, a·dokni Deputy Skotong Minister aro Urban Affairs Minister, Sniawbhalang Dhar-na sedoataha.

AYWO-ni Urban Affairs Minister-na badi ka·e sedoatgipa chittio janapatani gitade, sak 13 Tribal contractor-rangna on·gimin kamrangko maming u·iatani gri den·galahani gimin, Tribal Contractor-rangna namen neng·nikanirang ong·aha ine AYWO-ni General Secretary Changkey R Marak parakataha.

Tribal contractor-rangna on·gimin kamrangko maini gimin den·galpilaha, ma department-na maiba neng·nikani dongama, ma kam ka·anirangko kakket ong·gijanirang dongama uko namedake sing·sandina ga·akenga ineba Marak parakataha.

Mingsa aiao inmananide, kamrangna chamgimin tangka paisarangkoba den·galpilaha, uni a·selan an·tangtangna on·gimin kamrangko matchotangenggipa contractor-rangna dal·bea gimaani ong·aha aro ian department-ni gualani ong·chongmota. Uni gimin iani a·sel chong·motko sandina nangchongmota ine AYWO-ni General Secretary dabiangaha.

Gipin jatrangna chong·motan, Non-Tribal contractor-rangna kamrangko on·anio, Tura Municipal Board (TMB)-ni Executive Engineer-an jak donga nanga ine matnangatenba, Tribal contractor-na on·gimin kamrangko den·galpile ua kamrangko Non Tribal contractor-rangna on·skaaniara Tribal-rangko chonnikani ong·a aro iandakgipa Officer-rangni kamara ra·chakna man·gijani ong·a ine AYWO matnangataha.

Ua kamrangni bidingo ta·raken sandina nangchongmota aro duko ga·akenggipa contractor-rangna kamrangko on·piltaina namga. Unbaksana kam mingprakna chamgipa tangka paisarangni gimin talataniko on·china aro ong·gija dake tribal contractor-rangko den·galanio jak donggipa official-rangni kosako rakgipa ja·kurangko de·enba, niam gita sastiko on·china, AYWO a·dokni Urban Affairs Minister-ko didiataha.