@ghdnews.in@

Tura, Dec 24, 2025: East Garo Hills a·jani Songsak C&RD Block-ni ning·o donggipa Koksi Songma songo, niamgri ro·ong bikotani aro ro·ong jetani karkanako chalaiengani a·sel samtangtango ong·telaigiparangna aro jolo songdongenggipa manderangna neng·nikaniko ra·baenga ine A·chik State People’s Front (ASPF), a·dokni Skotong Minister Conrad K Sangma-na badi ka·doatenba, ua biapo niamgri chalaienggipa ro·ong jetani karkana aro ro·ong bikotaniko chipatchina didiataha.

ASPF-ni Skotong Minister-na sedoatgipa chittio parakatani gitade, Koksi Songma songo, niamgri ro·ong bikotani aro ro·ong jetani karkanarangko chalaiengani gimin song dam 12-ni Sordar-rang, ASPF-na badi ka·e sedoatani ja·man, ASPF-ni dilgiparang ua songona re·ange nion, ua jolrango ro·ongrangko bikotengani a·sel, sepang jolrango donggipa buring bolgrim aro chiring chibisikrangko nosto ka·enga ine nikna man·aha.

“Ia songo, niam gri ro·ongrangko bikotengani a·sel ia biapo jokenggipa Chiwate chiring nosto ong·engaha aro ia chiringni chiko jakkalenggipa dingtang dingtang songni manderang, neng·nikanirangko chagrongtokengaha. Indake niamgri ro·ong bikotani aro ro·ong jetanichi karkanaona dal·dalgipa truck garirang re·ruraengani a·sel, ia songo gital tarigipa PMGSY ramarang nosto ong·engaha aro ja·achi re·ruaenggipa manderangna, mongsongbate skul bi·sarangna kenchakna nangani ong·enga,” ine ASPF-ni dilgiparang parakataha.

Ua biapo ro·ong bikotengani gimin nangchongmotgipa lekkarangko mesokchina bi·on, East Garo Hills Deputy Commissioner-ni Premsons Motors Private Limited (PMPL)-na on·gipa lekkakosan mesokna man·aiaha, ineba ASPF parakataha aro maikai ua biapo ro·ong bikotna gita name inquiry-rangko dakchenggija NOC on·aha ine ASPF sing·doataha.

Ua biapo ro·ong bikotani aro ro·ong jetani karkanarangko chalaiengani a·sel buring bolgrimrang nosto ong·enga, a·arang ruronge jolo songdongenggipa manderangna kenchakani ong·enga, balwa aro chiring chibisikrang moila ong·atako man·enga aro dal·dalgipa kolrangko jakkalengani a·sel nangana bate gam·atanirangchi manderang aro matburingrang neng·nikanirangko man·enga ine janapatenba, ua biapo ro·ong bikotaniko aro ro·ong jetani karkanarangko chalaiani bidingo ta·raken sandianiko dakchina aro lekkarangko name nichina ASPF didiataha.