Tura, Mar 5, 2025: Meghalayaa·dokna dakgrikdilgipa aro Meghalaya a·dokni skanggipa Skotong Minister Captain Williamson A.Sangma-ni nikjumange donanggipa Tura-ko Winter Capital songanian ong·achim, ine A·chik Holistic Awakening Movement (AHAM) parakatenba, uni nangnikaniko chu·sokatchina a·dokni Skotong Minister Conrad K Sangma-na sedoataha.

AHAM CEB HQ, Tura-ni Skotong Minister-na sedoatgipa chittio parakatani gitade, Meghalaya a·dokko 1972 bilsio man·chengani somoion, a·doko songdongenggipa pilak jatrangan apsan dake namroro silroroaniko on·na a·dokni skanggipa Skotong Minister Capt. Williamson A Sangma, Tura-ko Winter Capital songna tik ka·angahachim.

Garo Hills-ba Meghalaya a·dokni bak ong·pae, pilakni gitan namroro silroroaniko man·china a·dokni skanggipa Skotong Minister Capt. WA Sangma, Tura-ko Winter Capital songna tik ka·e donangaha. Bilsio ja 6-na Tura-o Winter ba Second Capital aro Shillong-o ja 6-na Summer Capital songanichi Garo Hills-oba apsan namroro silroroaniko ra·bana man·gen, ine Capt. WA Sangma-ni nangnike nikjumanganiko chu·sokatani ong·gen, ine AHAM CEB HQ-ni President Georgeprince Ch. Momin parakataha.

Tura-ko Winter Capital songna nangengani gimin a·selrangko janapatenba, bilsi 50 batangpilahaoba Garo Hills-o inditan ja·manchakaniko man·engani gimin a·dokni pilak biaprangnan apsan bak rengsiko on·na man·na gita Tura-ko Winter Capital songna nangchongmota ine AHAM dabiangaha.

A·dokko sasaon ka·anio sorkarini nang·chongmotgipa Executive, Legislative aro Judicial bakgittamkon jadokna Tura-o, jadokna Shillong-o donanichi Garo Hills-o songdongenggipa manderangni nanganirangko chu·sokatna man·gen, ineba Momin parakataha.

Batanggipa adita salrangna skang Assam a·dokni Skotong Minister Himanta Biswa Sarma, Dibrugarh-ko Second Capital ine parakatani bidingo janapatengon, uan Assam sorkarini kamrangko pilak biaprangona gipatani ong·enga ine AHAM-ni President parakataha.

Uuasan ong·aigija India a·songni dingtang dingtang a·dokrango Second Capital-ko songe on·na man·ode, maina Meghalaya a·doko Second ba Winter Capital-ko Tura-o songe on·na man·jawa, ine Momin sing·doatenba, Tura-ko Second Capital songe, sorkarini pilak kamrangko gipatna man·gen aro apsan daken Garo Hills-oba namroro silroroanirangko man·genchim, ine Momin parakataha.