Tura, Jan 5,2025::West Garo Hills a·jani Batabari sepang jolo donggipa Makbilkolgre Songgital-o Jal Jeevan Mission (JJM) project-ni tarigipa pipe line-rang chi name jokjaengani gimin songni manderang namen neng·nikaniko man·enga ine, A·chik Dedicated Integrity Leaders (ADIL) Selsella Regional Unit-na badi ka·atako man·soani ja·man, ADIL Selsella Regional Unit-ni dilgiparang Monggolbar salo re·ange sandianiko dakahaon, Makbilkolgre Songgital-o donggipa nokdang ge-43-oni nokdang ge-13 rangsan ringani chiko man·enga, nokdang ge-30 rangde JJM-ni chiko man·jaenga ine nikna gita man·aha.
Iani bidingo ADIL Selsella Regional Unit-ni President department-ni Junior Engineer aro Western Zonal-ni Officer-rangko okamate, songni manderang baksa tom·e chanchirimaniko dakenba, chi jokgijagipa nokdangrangna apsandake chiko jokate on·pachina, JJM Contractor Nurmilla Koch-ko didiangaha.
Indake, Makbilkolgre Songgital-o chi jokgija neng·nikani man·enggipa nokdangrangna chirangko jokate, on·na gita pipe line-rangko niroke taripilgen ine contractor songni manderangna ku·rachakaha ine u·iataha.
