Resubelpara, Nov 25: Adita salrangna skang North Garo Hills a·jani Chorebolbok songo Job Card-ni bidingo songni manderang kajia ong·enga ine Garo Digital News-na watatani gimin, website-o news seatani ja·man, Chorebolbok songni VEC Secretary tol·e matnanganisan ong·aia ine parakatenba, songona re·bae, Spot inquiry ka·ebo ine call ka·atani gimin, spot inquiry-na reporter saksako watataha.

Indake, reporter spot inquiry ka·ani somoio Chorebolbok VEC-ni ning·o ga·akgipa A·kong songni me·chikma saksa Jenny K.Sangma-ba segipa Rilipson Marak-ko siaha ine Death Certificate tarie, Job Card-ni hajirako VEC-ni Secretary Jewilson Sangma aro songni Sorder Laston Momin oke cha·aha ine kobor ra·timgiparangna aganataha.

Jenny Sangma-ni kobor ra·timgiparangna parakatani ja·mano adita songbad-rang aro Youtube channel-rango gatatako niksoe, ia obostani bidingo, South Garo Hills a·jani Social Activist Greneth M.Sangma, Sombar salo North Garo Hills a·jani Deputy Commissioner (DC)-na badi ka·e lekka sedoatenba, sigija mandeko siaha ine tol·drae Death Certificate tarie, job card-ni hajirako oke cha·gipa VEC Secretary Jewilson Sangma aro Sorder Laston Momin-ni kosako ta·rake sandianiko dakenba, niam gita raka sastirangko on·china dabiangaha.

Jenny Sangma-ni kobor ra·timgiparangna aganani gitade, job card-ni hajirako man·jani gimin sandiani ja·manosa, “Angni segipa Rilipson Marak-ko siaha ine VEC Secretary-ni Death Certificate tarie tangka okako ma·siaha. Angni segipa sikuja ua February jao Chennai-chi kam ka·na re·angaha aro ua an·tangan Chennai-chi re·angna skang, job card kam ka·e donangaha. Job Card-ni tangkako gipinrang man·ahaoba, maini gimin chinga man·jaenga, ine angni ripengrang baksa anga block office-chi re·ange, sandioba apsan kattakon aganatahani gimin, chinga DC office-ona re·ange complaint sedoani ja·manosa a·sel chong·motko ma·sina man·aha” ine Jenny Sangma suk ong·gija aganaha.

“Angni segipako maini gimin sigijako siaha ine death certificate tariaha ine sing·on, biara songo dongjaba ine Secretary aganchakaha. Na·a VEC-ni Secretary ong·eba, songtangni mandeko ma·sijama, ine Secretary-ko anga manengaha. Angni segipa sigijako siaha ine death certificate tarigipa na·a pap nanggen ine anga manengaha. Na·a angni tangkako on·ama on·jawa ine anga Secretary-o sing·on, maina on·gen, anga ine Secretary aganchakaha. Angni hajirako on·na nanggen, on·jaode anga case ka·gen inahaon, case-ba ka·bo, jeba dakbo angko jail chipjawa, ine Jewilson Sangma aganchakani gimin anga suk ong·jae, uni nokoni re·bapilaha” ine Jenny Sangma aganaha.

Ia obostani bidingo duko ga·akenggipa nokdangni manderangna kakket bichalko on·china dabie, Greneth Sangma North Garo Hills a·jani DC, SP aro Resubelpara C&RD Block-ni BDO-na sedoatenba, dos dakgipa Chorebolbok songni VEC Secretary aro Sorder-ko rim·e, niam gita sastirangko on·china Sangma dabiangaha.