Tura, July 2,2025: Batanggipa 2014 bilsio A·chik National Volunteers Council (ANVC) aro ANCV-B dolrang, a·dok aro ma·mong sorkarirang baksa songgigrikanio soi ka·grikaniko ta·raken chu·sokatchina, Tura-ni MDC aro ANVC-B dolni gitcham Chairman Bernard N Marak, Union Home Minister Amit Shah-ko didiataha.

ANVC dolrang baksa songgigrikaniko gitcham Congress sorkari, bon·atchipe cha·bokaha aro da·onan ia songgigrikaniko chu·sokatkujaenga ineba Marak parakataha.

“Iani giminsa anga da·alo nang·na seachi u·iatna ga·akaha. Meghalaya a·doko Autonomous District Council (ADC)-rangko bilakbatatna aro a·dokni a·bri jolrango tom·tomani aro namroro silroroaniko ra·bana miksongesa songgigrike ANVC dolrang, sorkari baksa soi ka·grikaha. ANVC dolrang baksa songgigrikaoni da·o bilsi 10 batpiloba ia songgigrikaniko chu·sokatchipkujaenga,” ine Marak, Union Home Minister-na sedoatgipa chittio janapataha.

ANVC dolni manderang an·tangtangko bame on·ahaoba aro tom·tomaona re·bahaoba, sorkarini ku·rachakgimin dakchakanirangko man·kujaenga ine Marak matnangataha.

“Je department-rangkon a·dokni ADC-rangna watatna nangachim, da·onan ia department-rangkoba ADC-rangona apjitkujaenga. Jadokprak tom·na nanggipa Monitoring Committee-ba 2019 bilsio COVID sajinma a·bachengaonin tom·chipkujaenga.
Una agreba, ia songgigrikanio tik ka·gimin gita a·dok sorkari, State Level Monitoring Committee-ko songchipkuja aro State Finance Commission-koba songchipkuja,” ine Tura-ni MDC aro ANVC-B dolni gitcham Chairman parakataha.

ADC-rangna namroro silroroaniko ra·bana miksonge chame on·atgipa tangka paisarangko jakkalsretaha aro mitamkode ja·manchakesa on·atenga ineba Marak matnangataha.

“Uni gimin Garo Hills-ni headquarter Tura songjinmao Central Level Monitoring Committee-ni tom·aniko ong·atna gita Home Affairs Ministry-ni Joint Secretary-na ge·etaniko on·china anga mol·molenga,” ine Marak, Union Home Minister-na seatgipa chittio parakataha.