Shillong, Jun 18, 2025: Raja Raghuvanshi-ko so·otgipa biapona Meghalaya Pulis aro Special Investigation Team (SIT), Monggolbar salo segipako so·otgipa Sonam Raghuvanshi aro gipin sakbri manderangko Sohra-ona rimangaha aro uamang maidake Raja-ko so·otachim, mesoke on·angaha. Pulisrang Raja-ko so·otna jakkalgipa atte bolgipinko Wei Sawdong chidare sambaoniko man·taiaha.

Ua a·sel ong·anio dos dakgipa manderang, chong·motan Sonam Raghuvanshi aro uni mikchakgipa, Raj Kushwaha baksana Akash Rajput, Vishal Singh Chauhan aro Anand Kurmi-ko Sohra-ona rimangani bidingo kobor ra·timgiparangna aganengon, dos dakgipa manderangko a·sel ong·gipa biapona rimbae, sing·sandiani ja·man ia a·selni bidingo talbate ma·sina gita man·aha aro sakkirangko video ka·e ra·aha ine East Khasi Hills a·jani SP Vivek Syiem aganaha.

Ia a·selni bidingo am·sandienggipa SIT-ni manderang, Mawlakhiat songoni a·bachenge Wei Sawdong parking lot-ona kingking, a·sel ong·gipa biaprangko name nipilangaha ineba Syiem aganaha.

Syiem-ni aganani gitade, Monggolbar salo pulisrang, dos dakgipa manderang baksa uamangni scooty donbagipa Mawlakhiat parking lot-oni a·bachenge, Raja aro Sonam-ni photo ka·na neng·takgipa biaprangkoba niangaha aro ia biapoba uamang Raja-ko so·otna jotton ka·ahachim, indiba man·jaha. Indake joljol re·angkuna nangaiaha.

Uni ja·mano uamang, Wei Sawdong parking lot-oni metre 200-mang chel·ao donggipa biapo photo ka·na neng·takaha, indiba ua biapode, uamang Raja-ko so·otna jotton ka·jaha ine Syiem aganaha.

Uandake, pulisrang, ua manderang baksa Wei Sawdong parking lot-ona re·angaha aro ua biapo uamang maikai scooty-rangko donaha, uarangko niangaha. Uni ja·mano pulisrang, viewpoint-ona re·ange, Raja-ni chadenggipa biapko ma·sina gita man·aha ine SP aganaha.

“Iako dake nina gita SIT, Fire aro Emergency Service-ni sipai saksako Raja-ni bakko ra·ataha aro ua bano maidake chadengmitingo uko so·otaha, ma·sina man·aha. Raja-ko changgittam dake den·aha, skanggipao Vishal Singh Chauhan, gnigipao Anand aro bon·kame Akash den·aha” ine Syiem aganaha.

Raja-ko den·gipa bolgipin attekoba Wei Sawdong-oniko man·aha aro dosi dakgipa manderangko pulisrangni sing·sandimiting somoion pulisrang ma·sina man·aha.
Ua manderang, maikai atterangko galataha, uarangko dake mesokaha. Gnigipa atteko sandina SDRF dol, metal detector-ko jakkalaha.

Re·anggipa June 2 tariko Raja-ni manggisi baksa man·gipa Akash-ni cholako maikai ua galatachim, uarangkoba SIT sing·sandie ma·sina man·aha. Raja-ni mobile-ko maikai Sonam aro Vishal nosto ka·e galaha, uani giminba SIT ma·sina man·aha.

Indake, dosi dakgipa manderangni kosako pulisrang, donsogimin somoini gisepon chargesheet ka·na ka·dongenga ineba Syiem aganaha.