Tura, Oct 17, 2026: Garo Hills-ni Nokma Sani Union (NSU), October 16 tarik Sukrobar salo dingtang dingtang NGO-rangni Nangrimgimin A·chik Dol (NAD)-ni ong·atanggipa tom·bimonganiona okamako man·e, New Tura LP Skul kal·chakramo “MIKGAOANI SAL”- ko manianio A·chik A·song gimikni Nokma Sanirangba bak ra·angpaaha.

Re·anggipa October 15 tarik Bristibar salo Council of Nokmani Hub News-o parakatgipa, GHADC Election-ko ra·doaniani gimin jegale, Nokma Sani Union, New Tura kal·chakramo tom·bimonganiko ong·atenga ine matnangataniara kakket ong·ja ma·sisretanisa ong·aia ine Nokma Sani Union parakataha.

Nokma Sani Union-ni talatani gitade, A·chik A·song gimikni Nokmarangko NANGRIMGIMIN A·CHIK DOL (NAD) aro dingtang dingtang Organization-rangni Mikgaoani Salko maniao Nokmarang bak ra·jachina ingipaosa, Council of Nokma champengataniko dakna gita agansamsoanisan ong·aiia.

Garo Hills-ni Nokma Sani Union, uan Non Profit Organization ba Organization-ni namgnina ong·ja, indiba A·chik A·songni A·king Nokmarangna aro GHADC-ni ong·siroroaniko nike, Nokmarangni niam retirangko tangchaatpilna, ma·gitcham pagitchamrangni daka rikanirangko ripingna, A·song aro jatko chel·chakna miksonganio bikotgipa kotok ba dol ong·a, ine NSU talataniko on·ataha.

Nokma Sani Union, darang political party baksa nangrimgipa ong·ja, Tura-ni MDC aro BJP-ni dilgipa Bernard N.Marak-ko Nokma Sanirangna agan ku·pattianiko on·china pangnan mikgaoatani
program-rango okamronga aro ua saksa ANVC-B-ni dilgipa ong·ani giminsa Nokmarangna chel·chake, Nokmarangni namgnina agan skie on·rongani giminsa chinga, awareness program-rango ma·talate on·china okamenga. Chinga Nokma Sani Union darang political party-ni mandeko ba·seja aro je mandeba A·chik Jatni aro Nokmarangni niam retirangko skie aro agan-ku·patie on·na changgipa donggenchimode Nokma Sani Union rimchaksona kusi ong·begen, ineba talatdapaha.

GHADC-o Separate Electoral Roll (SER)-ko tarie on·anina chinga, Dhormonath Ch. Sangma-ni EC aro A·dok Sorkariko Nokma Sani Union-ba gisik ka·tong gimikchi mittelpilskaaniko on·atenga.