Tura, Oct 17, 2026: Garo Hills Autonomous District Council (GHADC)-ni election-o susana gita Scheduled Tribe (ST) Certificate-ko nangtelgipa ong·atna aro Separate Electoral Roll (SER) ba dingtang Electoral Roll-ko tarichina dabianirang chu·sokahani gimin, Sukrobar salo, Garo Hills-ni dingtang dingtang NGO-rang aro Civil Society Organization-rangni, “Nangrimgimin A·chik Dol” (NAD)-ni bimango New Tura LP Skul kal·chakramo jinma tom·bimonge, re·jomaniko ong·atangaha.

Jinma tom·bimonganiko ong·ate, re·jomanio Garo Hills-ni dingtang dingtang NGO-rang, jedake GSU, GSMC, AIGU, DINDAM, ADIL, ACHIK, GES, NGCO, ANYO, CSAWO, AAYF, AGTHEA, GOERA aro Civil Society Organization-rang bak ra·angtokaha.

Indake tom·bimonganio dingtang dingtang NGO-ni dilgiparang aganprakangengon, GHADC election-o susagipa candidate-rang ST Certificate dongna nangtela aro dingtang Electoral Roll-ko tarichina dabianio, jail ba pattoko donako man·gipa dingtang dingtang NGO-ni dilgiparangna mande ra·pilskaaniko dakangjolaha.Indake ua dabianirang chu·sokahani gimin, A·chik jat gimik ku·cholsan ong·e bakrimanina, Garo Hills gimikni manderangkoba mittelpilangaha.

GHADC-ni election-ko ong·atninggija Council-ni term-ko ra·dodaproroengani giminba tom·anio dingtang dingtang NGO-rang, sorkarini kosako raken jegalangtokaha aro, re·baenggipa bilsini January 20 tarik ja·man jinma tom·bimonganiko ong·ate, GHADC election-ko ta·rake ong·atchina dabianggen ineba tik ka·angtokaha.

Mikkangchiba bilsiantian, October-ni 16 tarikko ‘A·chik Jatni Mikgaoani Sal’ ine gisik ra·e maniangna gita tom·anio NAD tik ka·angaha.

Indake jinma re·jomaniko, News Tura LP Skul kal·chakramoni a·bachengate Araimile, Hawakhana, DC Office, Tura Bajarko nappake Hawakhana gita re·jombae, apsan biapon matchotateaha.