Tura, April 16, 2025: Araimile Socio Cultural Club (ASCC) baksa Garo Hills Wildlife Division, Tura bakrime, “Save Wildlife and Litter Free Campaign cum Exposure Trip” ine miksonganiko done salgittamna, South Garo Hills a·jani dingtang dingtang Tourist Spot ba biaprangko nina re·angaha.

Uamangni salgittamna songreange nitogipa biaprangko nina re·angani miksongara buringni matburingrang jekai Matcha, Mongma, Matchok aro gipin dingtang dingtang buringni jonturangko mikangchi name aro ka·sae ripingangna, bol wa·arangko name ripingan baksa A·chik a·songo nitogipa Tourist biaprango cha·e ringe, plastic-rang aro plastic bottle-rangko skatang galjachina, re·kmange, songrango awareness program-rangko ong·atani ong·a.

ASCC, songni nokni manderangna agan ku·pattie on·a baksana jabol galchakani kalbongrangkoba suale on·angaha, jedakode manderang jabolrangko skatang galramaraigija kalbongrango chimonge donna gita man·gen. South Garo Hills-o nitogipa aro mingsinggipa Wari Chora-ko nina dingtang dingtang biaprangoni nina re·bagipa manderang jabolrangko skatang galgenchimode, nitogipa Tourist spot Wari Chora-ko nosto ka·a gita ong·gen. Uni gimin nitogipa A·chik a·songni Tourist Spot-rangko nisie galaoniko chel·chakna ASCC re·mikkange kamrangko ka·enga ine ASCC-ni President Ragim D.Sangma parakataha.

Indake, bon·kamgipa salo ASCC, Rekmangre song aro Dombe Wari-ni jabolrangko rongtalate donbajolaha.