Tura, Feb 22,2025:Garo Hills-ni dingtang dingtang NGO-rang ru·uta bilsirangonin Garo Hills Autonomous District Council (GHADC)-na Seperate Electoral Roll (SER)-ko tarichina dabitokengon, dingtang Electoral Roll (SER)-ko tarina pilak kamrangko ka·engaha, ine GHADC-ni Chief Executive Member (CEM) Pa Albinush R Marak, Bristibar salo A·chik Conscious Holistically Integrated Krima (ACHIK) Council-ni dilgiparangna ku·rachakataha.
ACHIK Council-ni dilgiparang iani bidingo songbad setimgiparangna parakatani gitade, GHADC-na dingtang Electoral Roll-ko tarina nangengani gimin agangrikon, dingtang electoral roll-ko tarina gita GHADC-ko chalaienggipa EC, man·a dipet ta·raken kamrangko ka·engaha aro dingtangmancha Expert Committee-ko songna am·engaha ine GHADC-ni CEM parakataha.
Albinush Marak an·tangni CEM ong·miting somoion, ia kamko matchotatna jotton ka·enga ine ACHIK Council-ni dilgiparangna ku·rachakataha.
Bangladesh, Assam aro gipin dingtang dingtang biaprangoni niam gri napdrae Garo Hills-o songdongtokengani gimin, ACHIK Council-ni dilgiparang, CEM baksa agangrikangaha ine u·iataha.
Sima ari jolrang gita gipin biaprangoni niam gri napdrabae Garo Hills-o songdong a·chaengani gimin agangrikon, niam gri napdrae songdongenggipa manderangko ku·cholsan ong·e champengsona nanggen ine CEM, ACHIK Council-ni dilgiparangna aganaha.
“Uni gimin chinga, ACHIK Council-ni gita, gipin biaprangoni Garo Hills-ona niam gri napdrabae songdongenggipa manderangko champengsona sorkari aro dingtang dingtang dolrang baksa bakrime kamko ka·gen” ine ACHIK Council-ni dilgiparang parakataha.
