Guwahati, March 28, 2026: Re·baenggipa April 9 tariko ong·atenggipa, Assam Legislative Assembly (ALA) Eleksin, 2026-o bilakbegipa susagrikani ong·enga. Assam a·doko dam 126 constituency-rang gnang aro ua constituency-rango sak 722 candidate-rang susaenga.

Ia changni eleksin-o Assam-ko sason ka·enggipa BJP sorkarini sasonko Assam-ni manderangara nangkugenma.? ma gital sasonko ba dingtanganiko nangnikengama, ian dal·bea sing·ani ong·enga aro manderangni chanchina nangani ong·enga. Ia eleksin-o dingtangmancha namen rakbegipa susagrikani ong·enga.

Assam a·dokni Skotong Minister Himanta Biswa Sarma, 2021 bilsioni da·alona sason ka·enga. Sarma, BJP dolni bilakgipa candidate ong·a aro gital sason-ni bilko ra·piltaina rakbee kamrangko ka·enga. Uni campaign ka·anio mongsonggipa pangchakanirangara, mikkangchi
nambatgipa sasonko ra·baani aro manderangna namgniko on·ani. Rama jal·lang aro gipin rika cho·anirangko namdapatani. Kam gri dongenggipa chadamberangna kam on·ani aro jatni dakbewal rikbewalrangko chel·chakani, irangan Sarma-ni namgipa miksongani ba ja·ku de·ani ong·a. Unbaksana
Sarma, ming 31 gital ku·rachakanirangko manifesto-o on·aha.

Congress dolni candidate Gaurav Gogoi, (Asom Sonmilito Morcha)-ni dilgipa, Assam-ni gitcham Skotong Minister, Tarun Gogoi-ni depante ong·a. Ua gital chasongni Congress dolko tang·doatpilgipa rakbee kamrangko ka·enggipa ong·a. Ua Jorhat-oni Assembly constituency-oni skanggipa changna Assembly eleksin-o susaenga aro uan, “Bor Asom” ba ka·sagipa aro tom·tomgipa Assam-na kamko ka·enga. Asom Sonmilito Morcha-ara Congress-chi dilgipa dolrangni bakrimani). Iani mongsonggipa kamrangko ja·rike Gogoi sason-ni bilona re·bana rakbee kamrangko ka·enga:

Uni miksonganiara namgipa aro rongtalgipa sason (Clean politics).
Me·chikrang aro bi·sarangna bilko on·ani.
Songalo pangkamgipa tom·tomaniko ra·baani, iarangan Gogoi-ni mongsonggipa miksongani ong·a.