Shillong, Mar 26, 2026: Garo Hills Autonomous District Council (GHADC) election-o Tribal ong·gijagipa manderangni susaaniko jegale, A·chikrangna chakpaaniko on·na gita, re·anggipa March 11 tariko, Confederation of Meghalaya Social Organisations (CoMSO)-ni Shillong songjinmao jinma tom·bimonganiko ong·ate re·jomanio ding·chaoatani kattarangko aganani gimin, badi (FIR) ka·ani ja·man, Hynniewtrep Youth Council (HYC)-ni President Roy Kupar Synrem-ko Bristibar salo, sing·sandianiko dakna gita, Lumdiengjri Pulis Station-o mikkang pa·ataha.

Ua tom·bimonganio Synrem-ni agangipa kattarangara, manderangko ding·chaoate a·doko so·sojengjeng ong·aniko ra·baaha ine uni kosako Sub Inspector M Khardewsaw, FIR ka·aha.

“A·chik jong-adarang, an·chingni dakchakaniko nanggenchimode, chingaba uamang baksa dakgrikpana man·aigen”, ine HYC-ni President, jinmana aganaha aro ua silchidarerangko keani giminba, janapahani gimin, uan manderangko ding·chaoatani ong·a, ine uni kosako pulisrang badi ka·aha.

Ua (Synrem) pulisrangko mikkang pa·ani ja·man, kobor ra·timgiparangna aganengon, uni agangipa kattarangara Garo Hills-o ong·enggipa obostani giminsa aganaha aro uni agananio ua, A·chikrangna chakpaaniko on·esa aganaiaha ine talataniko on·angaha.

Silchidare keani bidingo an·tangni janapgininko talatengon, ua A·chik jong-adarang baksa bakrime warachakanikosa miksonga aro manderangko ding·chaoatna miksongani dongja ine HYC-ni President aganaha.