Tura, March 26, 2026: Garo Hills Autonomous District Council (GHADC) eleksin-rango Tribal ong·gijagipa manderang bak ra·na man·jana gita, GHADC-o niamrangko taridape pass ka·gipa Assam & Meghalaya Autonomous District (Constitution of District Councils) Rules, 2026-ko Monggolbar salo, a·dokni Governor CH Vijayashankar ra·chakahani gimin, ian darang political party-ni ba badiaba dolrangni cheani ong·ja, indiba A·chik jat gimikni dal·begipa cheanisa ong·aha ine Monggolbar attamo, Tura-ni MDC aro BJP-ni State Vice President Bernard N Marak parakataha.

Tura MDC-ni parakatani gitade, GHADC-ni pass ka·e watatgipa Bill-ni bidingo ua ma·mong sorkarini dilgiparang baksa agangrikaton, ia Bill-ko Monggolbar salni bakon pass ka·gen ine ma·mongni dilgiparang ku·rachakataha aro Monggolbar salni gisepon, a·dokni Governor, ia Bill-ko pass ka·e da·o niam ong·ataha.

“Ian A·chik jatni dal·begipa cheani ong·a. Ia Bill-ko GHADC-o pass ka·ani ja·man, bang·bata manderangan angko maini gimin jrip dongenga ine chanchiengachim, indiba anga jrip dongja, ia Bill-ko ta·raken Governor ra·chakchina gita chinga kam ka·engachim. Anga ma·mongni dilgiparang baksa golpoaton, da·al salni bakon ra·chakgen ine uamang angna ku·rachakaniko on·ataha. Ia Bill-ko ta·rake Governor ra·chakchina gita chinga darangnaba u·iatgija kamko ka·na nangao ga·akaha, maina iani bidingo nangana batpile politics kal·aniko nikna man·aha. Uni gimin chinga ia kamko politics-o nangatna sikjae, ian jatni nangchongmotgipa kam ong·a ine nike, ma·mongni dilgiparang baksa agangrikataha. Ia kam da·alo chu·sokgipa ong·ahani gimin,vanga dingtangmancha Nokgipa Isolko aro A·chik jat gimikkon mittelna sika,” ine Marak parakataha.

Ia kamko chu·sokatna krenganio mitam NGO dilgiparang rim·ako man·aha aro mitamrang saknaanirangko man·aha, indiba bon·kamao Nokgipa Isolni ka·saachi, A·chik jat chegipa ong·aha ine Tura-ni MDC parakataha.