Shillong, March 26, 2026: Batanggipa salrango Garo Hills-o adita so·sojengjeng ong·ani bidingo pulisrang skatang manderangko rim·anichi obostarangko namjabatatani ong·naba donga ine warachakenggipa dolni dilgipa aro a·dokni gitcham Skotong Minister Dr. Mukul M. Sangma, mikrakataniko on·ataha.

Re·anggipa March 21 tarik Sonibar salo, a·dokni Governor CH Vijayashankar-ko gronge memorandum-ko on·ani ja·man, kobor ra·timgiparangna aganengon, so·sojengjeng ong·anio jak dongama dongja, uarangko name sandirokchenggija, pulisrang, manderangko skatang rim·enga ine Dr. Sangma aganenba, iandake manderangko skatang rim·ani a·sel manderangko ding·chaobatate, so·sojengjeng ong·aniko ra·bapilna, dosgri manderangkosa sasti on·e roskaenga, ine warachakgipa dolni dilgipa parakataha.

So·sojengjeng ong·aniko namatna ja·ku de·mike mesoknamangmang manderangko rim·aniara, manderangna ka·donganiko ra·baani pal, batesa ding·chaobatataniko a·bapilani gita ong·enga ine Opposition dolni dilgipa, mikrakataniko on·ataha.

Manderangko rim·na skangde, obostarangko name sandirokchengna nanga, sakki baksasa police-rang ja·kuko de·na nanga aro niamo pangchake manderangna on·gimin bilrangko mande ra·na nanga ineba Sangma aganaha.

Garo Hills-o so·sojengjeng ong·anina dingtang dingtang dilgiparangko rim·engani gimin adita salrangna skangsan Confederation of Meghalaya Social Organisation (CoMSO)-ba jajrengchakaniko parakatahachim. Indiba Garo Hills-o tom·tomaniko ra·bapilna nangengon, iandake dingtang dingtang dolni dilgiparangko rim·aniara, so·sojengjeng ong·piltaiani cholrang donga ine CoMSO-ni Vice President Sambormi Lyngdoh parakataha.

Garo Hills-o so·sojengjeng ong·anina pulisrang, ACHIK Organisation-ni dilgipa Johnny A Marak, Garoland State Movement Committee (GSMC)-ni Acting Chairman Balkarin Ch Marak aro gipin manderangko rim·aha. Indake NGO dilgiparangko ta·rake watpilchina, dingtang dingtang dolrang jekai Nangrimgimin A·chik Dol (NAD), GSMC, Nokma-Sanirang, A·chik A·songni manderang aro gipin dingtang dingtang dolrang a·dokni Skotong Minister aro Tura-ni SP-ko mol·molatahachim. Indiba da·alona kingking mamingkon knachakkujaenga.

Iandakgipa obostarangko a·dok sorkari nigrike, pangkamgipa tom·tomaniko ra·bana nangenga, ong·jaode Garo Hills-o tom·tomaniko ra·bapilna man·jawa, batesa namjabatjanaba donga ine Dr. Sangma mikkrakataniko on·ataha.