Tura, March 22, 2026: Garo Hills-ni nangrimgimin NGO-rang GHADC eleksin-o susana gita gipin jat rorirangni nomination file ka·na re·baaniko champengna, West Garo a·jani Deputy Commissioner Office napram cholgugao jinma tom·dake, dongengmitongo Phulbari-ni gitcham MLA Esamtur Mominin manigija re·badrae nomination file ka·na am·aniko rikagalatpilaha.

Esmatur Mominin nomination ka·na man·gija noktangona re·angpile, roriskarang baksa tom·e, Chibinang bajaro donggipa A·chikrangni dokkanrang aro GSU office-ko wa·al so·e galaha aro A·chikrangni songo nape, chadrapna a·bachengahani a·sel jatgnini gisepo ding·chaogrike, bilongen kajia ong·aha.

Indake, a·kawe jolo songdonggipa A·chikrang, rorirangni chadrapanina kenjagoke, janggitangko naljokatna, a·bri jolo donggipa A·chik songrangona katdoe chakenggipa manderangko Dadenggre-ni TMC MLA Rupa M.Marak aro uni ka·rimska, GHADC eleksin-o susaenggipa TMC candidate-rang aro dilgiparang baksa Gimegre, Takkimagre, Chandigre, Mronggre aro gipin dam 7 Relief Camp-rangona Sonibar salo re·angenba, cha·a ringani bosturangko ra·ange on·eaha.