Shillong, March 22, 2026: Warachakenggipa dolni dilgipa Dr. Mukul M.Sangma Sonibar salo NPP baksa melienga ine jangbingbangani gimin talatengon, “GHADC-ni mamlako gipin mamlarang baksa nangdimatna jotton ka·nabe,” ine parakataha

Garo Hills Autonomous District Council (GHADC)-o bakrimaniara Garo Hills-o ong·enggipa obostani giminsa ong·a, jean manderangni jakchi seoka man·gipa, MDC-rang apsan ku·monge kam ka·na nangao ga·aka, ia kattarangko gipin politics-ona ra·angna nangja ine Dr. Sangma talataha.

Dr Mukul Sangma-ni talatani gitade, District Council-o bakrime ja·ku de·aniara Garo Hills-ni A·chik jatni namgnina, daitoko ra·na seoka man·gipa gimik MDC-rangni daitoan ong·a. Jedakode, A·chik jatrang ku·cholsan ong·e kam ka·na man·gen, uni giminsa, District Council-o bakrimaha.

A·chik jatni namgnina re·mikkangengaon, darang Member-ba champengjachina, ine janapatenba, Dr. Sangma, MDC-rang gimikan House-o ku·cholsan ong·e chanchirimchina mol·molataha.

GHADC-o bakrimanina mikkangchi Meghalaya Legislative Assembly-o bakrimnaba donga ine chanchinabe, ineba Dr. Mukul Sangma parakataha.

Dr. Mukul Sangma, A·chik NGO-rangni dilgiparangko rim·ani gimin, jajrenganiko parakatenba, Governor-na memorandum on·ani ja·man, kobor ra·timgiprangna aganengon, “Obosta ong·ani mamlarangko sandiengon, chu·gimik am·sandianirangko dakenba, sakkirangko nigrikesa rim·na nanga” ine Dr Sangma aganaha.

Garo Hills-o obosta ong·ani ja·man, ACHIK Organisation-ni dilgipa Johnny A Marak aro Garo State Movement Committee (GSMC)-ni Balkarin Ch. Marak-ko kajia ong·ani mamlao Pulis rim·aha. Iani bidingo Confederetion of Meghalaya Social Organisation (CoMSO), jingjengatna mikrakataniko on·atskaha.