Shillong, March 22, 2026:: Leader of Opposition Dr. Mukul M.Sangma Garo Hills-o ong·enggipa obostarangna jajrenganiko parakatenba, Inquiry Commission-chi jakgittele am·sandianiko dakchina dabie, a·dokni Governor CH Vijayashankar-ko gronge, ia mamlako ta·raken nirokatchina mol·mole, Sonibar salo Shillong Lok Bhavan-o memorandum-ko on·angaha.

Garo Hills Autonomous District Council (GHADC)-ni eleksin ong·na a·bachengon, Garo Hills-o so·sojengjeng kajia golmalrang ong·angahani gimin, Dr. Sangma, dingtang dingtang dolrang aro Civil Society Organisation (CSO)-rang, GHADC eleksino A·chik ong·gijagipa rorirangni susaaniko champengatna dabianiko janapataha.

GHADC eleksino gipin jat rorirang bak ra·na man·jawa ine dingtang dingtang NGO-rang aro Civil Society Organisation-rang dabie jingjengataniko dakengon, Phulbari-ni gitcham MLA Esmatur Mominin, Sixth Schedule-ni niamko pe·e, manigija nomination file ka·drana re·baani a·selsa, Garo Hills-o so·sojengjeng kajia ong·aha, ine Dr. Sangma parakataha.

Garo Hills-o dal·begipa so·sojengjeng ong·ani bidingo janapatenba, sorkari ia obostarangko nirokna ba champengna man·jani a·selsa, iandakgipa obostarang Garo Hills-o ong·aha ine Dr Sangma-ni Governor-na seatgipa memorandum-o janapataha.

Indake ong·genchimoba da·ode, Garo Hills-o obostarang namkalangengjok. Ia ong·enggipa obostarangko tom·tomao rakkiangna miksonge, dingtang dingtang toromni dilgiparang, Tura-ni bilsi brigimin ma·gipa pagiparang aro gipin dilgiparang apsan ku·monge kam ka·anichi, Garo Hills-o so·sojengjeng ong·anirang ka·sinangaha ine Dr. Sangma aganaha.

Uni gisepon, a·dok sorkari Garo Hills-o ong·anggipa obostarangko ning·tue sandina gita, ta·raken Inquiry Commission-ko songe on·china, Dr Mukul Sangma agan-ku·pattiangaha. Unbaksana maidakgipa obostarang ong·anichi notification-ko on·na nangachim, iani chong·mot a·selko tale u·ina gita am·sandianiko dakchinaba Dr Sangma dabiangaha.