Tura, March 20, 2026:: Batanggipa adita salrangna skang, Garo Hills-o so·sojengjeng ong·anina rim·a man·gipa Garoland State Movement Committee (GSMC)-ni Acting Chairman Balkarin Ch Marak aro ACHIK Organisation-ni dilgipa Johnny A.Marak-ko ta·raken watpilchina GSMC Pedaldoba Regional Unit, a·dokni Skotong Minister-ko didiataha.

“Saksa A·chik ong·e aro a·doko sasonni bilko jako ra·e, a·dokni manderangna dangdike on·na an·tangko on·kanggipa ong·e, A·chik a·song aro jatni namgnina dakgrikdilgipa NGO-rangni dilgiparangko rim·aniara niamko pe·ani ong·a aro a·songni niam bidiko on·gimin bilrangko pe·ani ong·a ine anga nika. Ia dilgiparang, Sixth Schedule-o tribal manderangna on·gimin bilo pangchakesa tom·tomao A·chik jatni namgnina jingjengataha aro ia dilgiparangko rim·aniara niamni a·palo ong·a” ine GSMC Pedaldoba Regional Unit-ni Chairman Rimjen Ch Sangma, Skotong Minister-na seatgipa chittio janapataha.

NGO dilgiparangni jingjengataniara, Garo Hills Autonomous District Council (GHADC) eleksino susagipa candidate-rangna Scheduled Tribe (ST) Cerficate-ko nangtelgipa ong·atchina dabiesa jingjengataniko dakahachim. GHADC eleksino ST Certificate donggijagipa candidate-rangni susaaniko champengataniara, Sixth Schedule-o on·gimin Tribal jatrangni bilrangko chel·chaknasa ong·a ine GSMC Pedaldoba Unit-ni Chairman parakataha.

A·chik jatni namgnina jingjengatani giminsa, Nokma Sanirang, A·chik a·songni kitik brio songdongenggipa A·chik NGO-rang, A·chik ma·a parang, chadamberang aro dingtang dingtang Tribal manderang bak ra·angtokaha. Indake ia dal·begipa jingjengatanio bang·a manderang bakrimaniko on·angaha aro Tribal-rangna on·gimin bilko warachakaniba ong·a ine Sangma parakataha.

“Indian Constitution-ni on·gimin Sixth Schedule·ni niamo pangchakesa manderang, tom·tome tom·bimonganiko aro jegalanirangko dakna bil donga. Iandake dilgiparangko rim·aniara, niam bidiko on·gimin bilko pe·ani gita ong·a” ineba GSMC Pedaldoba Regional Unit-ni Chairman parakataha.

Garo Hills-o so·sojengjeng ong·anina dingtang dingtang NGO dolni dilgiparangko rim·e sasti on·anichi a·doko tom·tomaniko ra·bana man·jawa, batesa jatko ding·chaobatatani ong·enga ine janapatenba, rim·a man·gipa dilgiparangko ta·raken watpilchina GSMC Pedaldoba Regional Unit, a·dokni Skotong Minister-ko didiataha.