Ampati, Oct 17,2024: South West Garo Hills a·jani Zikzak Block-na namroro silroroaniko ra·bachina dabie A·chik Holistic Awakening Movement (AHAM) Zikzak Regional Unit, a·dokni Skotong Minister Conrad K Sangma-na sedoataha.
Zikzak Primary Health Centre (PHC)-ko Community Health Centre (CHC)-ona ra·doatchina didiatenba, Zikzak PHC-o sanna banani cholrang namen komia, indiba mande jelani namen tang·dobatahani gimin sanna bannani cholrangba tang·dona nangengaha ine AHAM Zikzak Regional Unit parakataha.
Una agreba Zikzak block-ni ning·o Degree aro Technical College-rangko kulie on·china gitaba AHAM, Skotong Minister-ko didiataha.
“Zikzak jolo lekka porani gadangko chubatatna Degree College-rang dongkujaengani a·sel chubata gadangrango poraina nangenggipa chatro chatrirang, km 15 chel·gipa Mahendraganj aro km 17 chel·gipa Ampati-ona re·ange poraina nangenga,” ine AHAM Zikzak Regional Unit parakatenba, Zikzak-o Degree aro Technical college-rangko kulie on·china Skotong Minister-ko mol·molataha.
Zikzak block-ni ning·o kal·susaani cholrangko namdapatchina gitaba, AHAM, Skotong Minister-ko didiataha.
“Zikzak jolo kal·susana changgipa sapgipa chadamberang donga, indiba kal·susaanirangko namdapatna gita maming cholrang dongjani a·sel chadamberangni changa sapanirang indin ong·gramenga,” ine AHAM Zikzak Unit parakatenba, Zikzak-o Sports Complex, Stadium aro Training Centre-rangko kulie on·china Skotong Minister-ko mol·molataha.
